د افغانستان لپاره کې د امریکا متحده ایالاتو ځانګړی استازی ټامس ویسټ وايي، طالبان دې د نجونو تر شپږم ټولګیو پورته زده کړو بندیز لغو کړي.
ښاغلي ویسټ د پنجشنبې په ورځ اپرېل ۲۱ (غوايي لومړۍ) پر خپل ټویټر پاڼه لیکلي چې په دې اړه یې د افغانستان د پخواني ولسمشر حامد کرزي سره خبرې کړي دي.
د افغانستان په چارو کې د امریکا ځانګړي استازي ویلي چې د طالبانو لخوا د نجونو پر زده کړو د پرله پسې محدودیتونو په اړه یې خپله سخته اندېښنه له ښاغلي کرزي سره شریکه کړې ده.
د هغه په خبره دغه محدودیتونه له افغانانو سره د طالبانو د مکررو تضمیونونو سره په ټکر کې دي، د ښځو او نجونو حقوق نقضوي او دافغانستان راتلوونکې کمزورې کوي.
ښاغلي ویسټ لیکلي،"موږ له طالبانو غواړو چې په ټول هیواد کې د دیني رهبرانو او افغانستان د مشرانو غوښتونو ته پاملرنه وکړي تر څو دغه بندیز لغو شي."
1/2 Pleased to speak with Afghanistan%27s former President Karzai today. Conveyed my deepest condolences over yesterday%27s barbaric attacks on school children and my grave concerns regarding the Taliban’s continued restrictions on girls’ education.
— U.S. Special Representative Thomas West (@US4AfghanPeace) April 20, 2022
په داسې حال کې چې پر افغانستان د طالبانو د حاکمیت څخه اته میاشتې تیریږي، د نجونو لپاره د ښوونځيو د متوسطې او لېسې دروازې بندې دي او د طالبانو حکومت د خپلې ژمنې خلاف د نوي تعلیمي کال په لومړۍ ورځ د ورې میاشتې پر دریمه نېټه، یو ځل بیا اعلان وکړ چې دنجونو تر شپږم پورته ټولګي به تر بلې خبرتیا پورې بند وي.
د طالبانو د پوهنې وزارت په ښکاره د نجونو تر شپږم پورته ټولګیو درسونو ځنډولو لپاره دوه دلیلونه وړاندې کړي دي.لومړی د شریعت مطابق د شرایطو برابرېدل او دوهم د افغاني دود او کلتور مطابق فضا رامنځته کېدل، خو د دغه معیارونو په اړه یې نور جزئیات نه دي ورکړي.
خو د طالبانو حکومت د پوهنې وزارت ویاند عزیز احمد رایان ویاند امریکا غږ ته وویل چې د نجونو پر مخ د متوسطه او لېسو پرانیستلو په اړه د طالبانو د رهبرۍ په کچه بحثونه روان دي.
بلخوا د ملګرو ملتونو د ماشومانو د ملاتړ صندوق (یونیسف) د ملاتړ او نړیوالو اړیکو مدېرې پالوما اسکودرو ویلي چې د افغان نجونو تعلم باید « سیاسي یرغمل» نشي.
اغلې اسکودرو پر خپل ټویټر پاڼه لیکلي:"ټولې نجونې باید اجازه ولري چې ښوونځيو ته بیرته ولاړې شي.نړیواله ټولنه او د افغانستان اوسني چارواکي په افغانستان کې د ټولو نجونو په خاطر باید له یو بل سره د همکارۍ لارې پیدا کړي. نور ځنډ مکوئ."
The education of Afghan girls cannot be held hostage to politics. All girls should be allowed to return to school.The international community and the de facto authorities must find ways to work together for the sake of every girl in #Afghanistan. Without any further delays. pic.twitter.com/ykvfjWktnb
— Paloma Escudero (@PalomaUnicef) April 18, 2022
تر دې مخکې د ملګرو ملتونو عمومي منشي انتونیو ګوتیریش خبرداری ورکړی و چې د نجونو ښوونځیو د بندېدو دوام به ټول افغانستان ته زیان ورسوي.
د امریکا د بهرنیو چارو وزات هم ویلي که چیري د یو هیواد نیمايي وګړي له زده کړو څخه محروم وي، نشي کولای په سیاسي او اقتصادي برخو کې پرمختګ وکړي.
له ۱۹۹۶ څخه بیا د ۲۰۰۱ کال پورې پر افغانستان د طالبانو د تېر حکومت پرمهال هم ښځې د کار او تعلیم له حق څخه محرومې وې او له کورونو څخه د وتلو پرمهال یې مجبورې وي چې حجاب وکړي او یا له یوه شرعي محرم سره ورسره وي.