ولسمشر ټرمپ ډیموکراتان تورن کړل چې د بهرنیو چارو وزارت ته د هغه د کاندید وزیر مایک پمپیو د تایدۍ مخه نیسي.
ولسمشر ډونالډ ټرمپ دبهرنیو چارو وزارت ته مایک پمپیو نوماند کړی دی. اوس داسې اندېښنې شته چې شاید ښاغلی پمپیو د سنا د بهرنیو اړیکو د کمېټې څخه د تائید هومره رایه ترلاسه نکړي چې د جلسي عمومي غونډې ته د باور او نه باور ترلاسه کولو لپاره وړاندې شي.
اسوشیتډپرس وايي ټولو ډیموکراتانو او لږ تر لږه یو جمهوري غوښتونکي ویلي دي چې ښاغلي پمپیو ته به د باور رایه ورنکړي. دا مهال د امریکا سنا ۱۰۰ غړي لري چې ۵۱ یې جمهوري غوښتونکي ، دوه مستقل او ۴۹ یې ديموکراتان دي، مستقل کاندیدان هم ډیموکراتانو سره دي.
ولسمشر ټرمپ همدغو اندېښنو پارولی دی. هغه وايي د دې خبرې منل سخت دي چې پمپیو به د باور رایه ترلاسه نکړي. هغه د ډیموکرات ګوند استازي تورن کړي چې "د سلګونو ښو خلکو د تائیدۍ" مخه نیسي.
Hard to believe Obstructionists May vote against Mike Pompeo for Secretary of State. The Dems will not approve hundreds of good people, including the Ambassador to Germany. They are maxing out the time on approval process for all, never happened before. Need more Republicans!
— Donald J. Trump (@realDonaldTrump) April 23, 2018
هغه وايي ډیموکراتانو جرمني ته د امریکا د سفیر د تائیدۍ مخه هم نیولې ده. ولسمشر ټرمپ په خپل ټویټر کې دا تور هم لګولی دی چې د ډیموکرات ګوند کاندیدان وخت ضایع کوي.
مایک پمپیو یو کال د امریکا د مرکزي استخباراتو ( سي آی اې) مشر و او تر هغه مخکې د کانګرس غړی و. ښاغلي پمپیو شاوخوا دوه اونۍ کې د شمالي کوریا له رهبر سره هم لیدلي وو.
هغه څو ورځې مخکې د امریکا د سنا په یوې غونډې کې د سناتورانو ګڼو پوښتنو ته ځوابونه وویل او ژمنه یې وکړه که د باور رایه ورکړل شوه، د متحدو ایالتونو بهرنۍ تګلاره به پوره عملي کړي.
د متحدو ایالتونو د سنا مجلس لا هم په دې اړه فکر کوي چې د ښاغلي پمپیو په اړه د همدغې اونۍ په اخره کې رايه اچونه وکړي.