د افغانستان د جمهور رئیس دویم مرستیال سرور دانش وايي چې د افغانستان له خلکو او حکومت سره د طالبانو جګړه بهرنی ماهیت لري او د دغې ډلې د سولې ادعا له درواغو پرته بل څه نه دي.
ښاغلي دانش د پنجشنبې په ورځ د جولای ۱ (چنګاښ ۱۰) په خپل تویټر کې د افغانستان په جګړه کې د ګاونډیو هېوادونو د یو شمېر چارواکو د مداخلې او ملاتړ په اړه څرګندونو ته اشاره کړې ده.
ښاغلي دانش ویلي: "د طالبانو له لوري د جګړې او تاوتریخوالي لوړه کچه ښيي چې د دوی د سولې ادعا له درواغو پرته بل څه نه دي او دغه ډله په سیاسي حل لارې هېڅ باور نه لري".
The escalation of war and violence by the Taliban shows that their claim for peace is nothing but illusion and this group does not believe in political solution. 2/4
— Sarwar Danesh (@VPdanesh) July 1, 2021
څو ورځې وړاندې د پاکستان د کورنیو چارو وزیر شیخ رشید احمد له جیو نیوز تلویزیون سره په مرکه کې وویل چې د زیاتره طالبانو کورنۍ د پاکستان په مختلفو ښارونو کې ژوند کوي.
شیخ رشید احمد زیاته کړې چې د طالبانو مړي په پاکستان کې خاورو ته سپارل کېږي او همداشان په پاکستان کې د دغې ډلې د ټپیانو درملنه هم کېږي.
د افغانستان د جمهور رئیس د دویم مرستیال په وینا په اوسنیو شرایطو کې پراخ ملي مقاومت، د طالبانو په وړاندې ولسي پاڅون، د ملي یووالي پیاوړتیا، سیاسي اجماع او د افغانستان له امنیتي ځواکونو څخه ملاتړ د طالبانو په خلاف یوازینۍ لاره ده.
طالبانو تر اوسه د افغان حکومت د دغه لوړپوړي چارواکي څرګندونو ته غبرګون نه دی ښودلی.
دا څرګندونې په داسې مهال کېږي چې په قطر کې د افغانستان د دولت او طالبانو ترمنځ د سولې خبرې په اساسي توګه پیل شوي نه دي او طالبانو په څوو ولایتونو کې خپل بریدونه زیات کړي دي.
د افغانستان د دفاع وزارت د معلوماتو په اساس په تېرو ۲۴ ساعتونو کې د افغانستان په ۱۵ ولایتونو کې د افغان ځواکونو او طالبانو ترمنځ جګړې دوام درلود.
کابل کې د امریکا د سفارت شارژدافیر راس ویلسن هم تېره ورځ په طالبانو غږ وکړ چې تاوتریخوالی ودروي او د سولې میز ته راوګرځي.