د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد د افغان حکومت او طالبانو لخوا د بندیانو د ازادولو هر کلی کړی او هغه یې د سولې د بهیر او تاوتریخوالي کمولو په برخه کې یو مهم ګام بللی دی.
ښاغلي خلیلزاد نن دوشنبه اپرېل ۱۳(وري ۲۵) پر خپل ټوېټر لیکلي چې دواړه خواوي باید د امریکا او طالبانو ترمنځ د سولې تړون مشخصو اهدافو رسېدو په برخه کې هڅې وکړي.
هغه ویلي: "د افغان حکومت او طالبانو لخوا د بندیانو د ازادلو هر کلی کوم، د بندیانو ازادول د سولې بهیر او تاوتریخوالي کمولو په برخه کې مهم ګام دی."
(1/2) Welcome the release of prisoners by both the Afghan government and the Taliban. The release of prisoners is an important step in the peace process and the reduction of violence.
— U.S. Special Representative Zalmay Khalilzad (@US4AfghanPeace) April 13, 2020
نوموړي همدارنګه زیاته کړې چې د کروناویروس خپرېدو زندانونه له واقعي ګواښ سره مخ کړي چې په وینا یې دا بهیر باید په چټکۍ سره مخته ولاړ شي.
پر همدې مهال د افغانستان د ملي امنیت شورا ویاند جاوید فیصل نن دوشنبه پر خپل ټوېټر لیکلي چې تر دا مهاله ۳۶۱ طالب زندانیان د ولسمشر غني د حکم پر اساس له بګرام زندان څخه خوشي شوي دي.
نوموړي زیاته کړې چې د یاد فرمان پر اساس به د افغانستان له نورو زندانونو څخه هم د نورو بندیانو ازادول جریان ولري چې ټول شمېر به یې ۱۵۰۰ تنه شي.
The Government released 361 Taliban prisoners from Bagram prison under the presidential decree of March 11. As per the decree, releases will continue across other prisons to free a total of 1,500 as part of our efforts to advance peace and fight #COVID19.
— Javid Faisal (@Javidfaisal) April 13, 2020
د افغانستان د ملي امنیت شورا وايي چې یاد طالب بندیان د هغوی روغتیايي وضعیت، عمر او د مجازاتو د پاتې مودې ته په کتو، د سولې د هلو ځلو او د کرونا د مهارولو د هڅو د برخې په توګه خوشي کیږی.
د ملي امنیت شورا همداشان ویلي، دا شمېر طالب بندیان په هغه اوږد لیست کې شامل دي چې د طالبانو درې کسیزه پلاوي له افغان لوري سره په کابل کې د خبرو اترو په لړ کې شریک کړی و
بلخوا وسله والو طالبانو هم تېره ورځ د ۲۰ افغان امنیتي سرتیري د خوشي کولو اعلان وکړ. د طالبانو ویاند ذبیح الله مجاهد ویلي چې یاد بندیان د دوی له لوري په کندهار ولایت کې سره صلیب ته وسپارل شول.
د افغانستان د ملي امنیت شورا ویاند جاوید فیصل بیا وايي دوی نه پوهیږي چې طالبانو څوک ازاد کړي دي.
خو د سره صلیب کمېټې ویلي چې د طالبانو لخوا ور سپارل شوي ۲۰ تنه بندي افغان سرتیري یې د کندهار والي دفتر ته سپارلي دي.