د پاکستان د مخکني صدراعظم عمران خان تر نیول کیدو وروسته ځینو هیوادونو او په پاکستان کې دننه او بهر یو شمیر کسانو بیلا بیل غبرګونونه څرګند کړي.
د متحده ایالاتو د بهرنیو چارو وزارت ویلي چې د عمران خان او بل هر سیاستوال پر ضد قضیې د پاکستان کورنۍ موضوع ده.
دې وزارت د ښاغلي خان د نیول کیدو په غبرګون کې ویلي، "مونږ په پاکستان کې د دموکراتیکو اصولو او قانون د حاکمیت درناوی غواړو، لکه څنګه یې چې په نورې نړۍ کې غواړو".
د متحده ایالاتو تر څنګ د برتانیې د بهرنیو چارو وزارت هم په پاکستان کې د عمران خان تر نیول کیدو وروسته ویلي چې پاکستان کې وضعیت له نږدې څاري.
دې وزارت په یوې اعلامیې کې ویلي، "برتانیه د پاکستان سره نږدې او اوږدمهاله اړیکې لري. مونږ د دموکراتیکو اصولو او قانون د حاکمیت ملاتړ کوو".
پولیسو د شنبې په ورځ اګست ۵ (زمري۱۴) د پاکستان پخوانی صدراعظم او د تحریک انصاف ګوند مشر وروسته له هغه ونیو چې د اسلام اباد یوې محکمې هغه د بهرنیو هیوادونو څخه د ډالۍ اخیستو په قضیه کې په درې کاله بند محکوم کړ.
ښاغلي خان په یوې ویډیو کې چې د نیول کیدو څخه وړاندې یې ثبت کړې وه د پاکستان خلکو ته په خطاب کې ویلي چې تر نیول کیدو او زنداني کیدو وروسته یې باید تر هغه پورې اعتراض وکړي چې له "غلامۍ څخه ازاد شي".
د عمران خان تر نیول کیدو وروسته د هغه یو شمیر پلویانو په پیښور کې مظاهرې وکړلې او د خپل مشر نیول کیدل یې وغندل. ځینې ویډیوګانې چې په ټولنیزو شبکو کې خپرې شوې، پکې ښودل کیږي چې د پولیسو او عمران خان د پلویانو تر منځ اخ او ډب شوی.
د متحده ایالاتو د جان هاپکنز د پوهنتون پروفیسر سټیف هانک په پیښور کې د عمران خان د پلویانو یوه ویډیو خپره کړې او د مظاهره چیانو سره یې د پولیسو په چلند انتقاد کړی.
هغه په ایکس ټولنیزې شبکې کې د دې ویډیو سره لیکلي، "د مخکني صدراعظم عمران خان تر نیول کیدو وروسته، د پاکستان د قانون تطبیق ځواکونه اوس په ښکاره توګه د خان سوله ایز پلویان وهي. پاکستان = پولیسي دولت".
#PAKWatch: After arresting former PM Imran Khan, Pakistani law enforcement is now openly beating peaceful Khan supporters. PAKISTAN = POLICE STATE? Take a look at the scene in Peshawar:pic.twitter.com/90EOEou9vW
— Steve Hanke (@steve_hanke) August 5, 2023
په پاکستان کې دننه هم ځینو کسانو د عمران خان په نیول کیدو سخت انتقادونه کړي.
ښاغلي داوړ لیکلي، "یو صدراعظم (نواز شریف) د اقامې لرلو له کبله محکومیږي او دا دی بل یې د لاسي ساعت پلورلو له کبله. سیاستوال په دا شان ناڅیزو مسایلو بې اعتباره کیږي خو جنرالان بیا خیانت کوي او خوندي پاتې کیږي".
هغه همدارنګه لیکلي چې په پاکستان کې د "عمران خان په شان د سیاستوالو څخه ګټه اخیستل کیږي او بیا "ایسته اچول کیږي".
A PM was convicted on an iqama and now another on selling a wrist watch. Politicians get discredited over such trivial matters while Generals get away with treason. Politicians keep getting used and then are discarded like Imran Khan. We keep going round and round in circles.
— Mohsin Dawar (@mjdawar) August 5, 2023
ځینو کسانو بیا په ټولنیزو شبکو کې په عمران خان د لاسي ساعت پلورلو په تور ملنډې هم وهلي دي.
د سویډن د اوپسالا په پوهنتون کې د سولې او شخړې څانګې پروفیسر اشوک سوین لیکلي چې د لاسي ساعت پلورلو له کبله د عمران خان نیول کیدل پدې معنی چې ګڼې پاکستان کې فساد نشته.
هغه د ایکس په ټولنیزې شبکې کې لیکلي، "عمران خان د لاسي ساعت پټولو په تور زندان کې اچول شوی. زه نه پوهیدم چې په پاکستان کې سیاستوال څومره پاک دي او د فساد څخه پاک دی".
Imran Khan has been put in jail on the charges of stealing a watch. I had no idea that in Pakistan, political leaders are so clean and the country is so corruption free!
— Ashok Swain (@ashoswai) August 5, 2023
د روان کال د مۍ د میاشتې په نهمې د پاکستان د احتساب د ملي ادارې "نیب" له خوا د مالي غبن په قضیه کې د عمران خان د نیولو وروسته د پاکستان په ټولو ښارونو کې د تحریک انصاف د ګوند د مشر د نیولو په خلاف لاریونونه وشو، چې په ترڅ کې یې یو شمیر پوځي او دولتي تاسیساتو ته زیان ورسید.
له دې مظاهرو وروسته، چې د تحریک انصاف د زرګونو پلویانو د نیول کیدو او د ځینو مشرانو د استعفا لامل شو، عمران خان، د مې په ۱۲مه (د غويي ۲۲) په ضمانت خوشې شو او له درې ورځو توقیف وروسته کور ته ستون شو.
د پاکستان پخوانی صدراعظم چې له ۱۵۰ تورونو سره مخامخ دی، څو ځلې د پاکستان په پلازمېنه اسلام اباد کې محکمې ته حاضر شوی دی.