د ملګرو ملتونو د ماشومانو صندوق " یونیسف" د شنبې په ورځ مارچ دولسمې ( کب ۲۱) وویل چې په یمن کې د تاوتریخوالي له زیاتېدو وروسته د جنورۍ او فبرورۍ په میاشتو کې په دغه هیواد کې ۴۷ ماشومان وژل شوي یا معلول شویدي.
یونیسف ویلي په یمن کې له ۲۰۱۵ کال راهیسې د جنګ په زیاتېدو سره شاوخوا سل زره ماشومان وژل شوي یا ټپیان شویدي.
د یمن لپاره د یونیسف استازي فلیپ دومیلې د یوې بیانیې په خپرولو سره وویل:" د یمن په بیلابیلو برخو کې د روان عیسوي کال په دوه میاشتو کې ۴۷ ماشومان وژل شوي یا هم معلول شویدي."
په بیانیه کې ویل شویدي:" په یمن کې شاوخوا ۷ کاله مخکې د جنګ په زیاتېدو سره ملګرو ملتونو د ۱۰۲۰۰ ماشومانو وژنه او ټپي کېدل تائید کړي، د وژل شویو ماشومانو اصلي شمیره له دې ډیره لوړه ده."
د اوکراین د پارلمان یوه غړي د پنجشنبې په ورځ وویل چې په اوکراین باندې د روسیې د یرغل له پیل راهیسې د دوه هفتو په موده کې شاوخوا ۷۱ ماشومان وژل شوي او له ۱۰۰ زیاتو ټپیان شویدي.
د ایران پلوه حوثي یاغیانو او سعودي پلوه حکومتي ځواکونو ترمنځ د جګړې د مستقیمو او غیر مستقیمو عواملو له امله په یمن کې په سلګونو زرو خلک وژل شویدي.
د نومبر په میاشت کې د ملګرو ملتونو پرمختیايي پروګرام اټل کړی و چې د ۲۰۲۱ کال ترپایه ښايي د جنګ، لوږې، د ناپاکو اوبو او ناروغۍ له امله په یمن کې ښايي ۳۷۷۰۰ خلک خپل ژوند له لاسه ورکړي.
ښاغلی دومیلې وویل:" تاوتریخوالي اونورو ناخوالو د میلیونونو ماشومانو او کورنیو په ژوند ناوړه اغېزه کړېده."
د یونیسف په بیانیه کې ویل شويدي:" دایې وخت دی چې دیمن شخړې ته یوه سیاسي حل لاره پیداشي چې خلک یې له خپلو ماشومانو او کورنیو سره په سوله کې ژوند وکړي."
جګړې په یمن کې د عامې روغتیا او پوهنې په شان د ژوند لومړني خدمات له منځه وړي، په میلیونونو کسان یې بې ځایه کړي او د دغه هیواد ۸۰ فیصد نفوس یې بهرنیو مرستو ته محتاج کړی.
له ۲۵۰۰ زیات ښوونځي له کاره لویدلي، د یونیسف د معلوماتو له مخې دغه ښوونځي یا وران شوي، یا ورڅخه د پوځي مقاصدو لپاره کار اخیستل کیږي او یاهم د بې ځایه شوو خلکو د سرپناه په توګه کارول کیږي.
د جنورۍ په میاشت کې د ملګرو ملتونو د امنیت د شورا په یوه خپاره شوي رپوټ کې ویل شوي و چې د حوثي یاغیانو په لیکو کې جلب شوي ۲۰۰۰ ماشومان او تنکي ځوانان د ۲۰۲۰ کال د جنورۍ او ۲۰۲۱ کال د مې تر میاشتې پورې په جنګ کې وژل شویدي.