د ایران د حکومت ضد مظاهرو په دوهمه ورځ اعتراضونه دریم ستر ښار اصفهان ته پراخې شوې دي. دغه مظاهرې چې په سلگونو کسانو په کې برخه اخیستې د هیواد د اقتصادي وضعیت په هکله د ایرانیانو د غوسې څرگندونکې دي.
په ټولنیزو رسنیو کې د خبرونو، تصویرونو او هغو ویدیوگانو په بنسټ چې د امریکا غږ ته استول شوي د چهارشنبې په ورځ زیات شمیر خلکو د اصفهان د شاپور جدید په سیمه کې د اقتصادي بحران او د هغه په وړاندې د حکومت د اجرااتو په اعتراض مظاهره کړې وه.
په یو شمیر ویدیوگانو کې اعتراض کوونکي شعارونه ورکوي چې "د هر ایراني سکوت د ایران په وړاندې خیانت دی" او "خامنه یي حیا وکړه، هیواد خوشې کړه".
د رپوټونو له مخې پولیس د مظاهره کوونکو سره نښتي او خلکو په لارو کوڅو کې ټایرونو ته اور اچولی دی.
♦️ ویدئو کوتاه | آتش زدن لاستیک در #اعتراضات منطقه #شاپورجدید #اصفهان و شعار #خامنهای حیا کن، مملکتو رها کن pic.twitter.com/8RHGOy2pbw
— VOA Farsi (@VOAIran) August 1, 2018
اعتراض کوونکو ویلي دي چې دوی د ریال په وړاندې د ریکارد په سطحه د ډالر د بیې د لوړیدو په نتیجه کې د وارد شویو تولیداتو د لوړو بیو په وجه مظاهرې کوي. د اعتراضونو نور دلیلونه فقر او بیکاري یاد شوي دي.
امریکا غږ ته په استول شویو ویدیوگانو کې یو شمیر خلک او مغازه لرونکي لیدل کیږي چې دکانونه یې تړلي دي او د مظاهره کوونکو سره یو ځای شوي دي.
پدغو خپرو شویو ویدیوگانو کې اعتراض کوونکو د حکومت د سیاستونو د غندلو لپاره دا شعارونه هم ورکړي دي چې "نه غزه، نه لبنان، ځان فدا له ایران نه".
♦️ ویدئو کوتاه | #تظاهرات آرام مردم در منطقه #شاپورجدید #اصفهان در روز چهارشنبهفیلمهای ارسالی از حضور مردم معترض در دومین روز #اعتراض در این شهر خبر می دهد. pic.twitter.com/Q4cQo6UHdw
— VOA Farsi (@VOAIran) August 1, 2018
پدې وروستیو ورځو کې په غیر رسمي بازار کې د یو امریکایي ډالر ارزښت ١٢ زره تومان ته ورسیده. تر اوسه د روحاني د دولت هڅه د ډالر د بیې د کنترگول لپاره ناکامه شوې ده.
دا پداسې حال کې دي چې په څو راتلونکو ورځو کې د ایران پر اټومي پروگرام باندې د امریکا د جمهور رئیس دونالد ټرمپ له خوا لگول شوي بندیزونه پیل کیږي چې هدف یې د ایران د تیلو او غاز بازار دی.