د پېښور عالي محکمې حکم کړی چې د خېبرپښتونخوا په شخصي ښوونځيو کې دې پښتو ژبه د لازمي مضمون په توګه تدریس شي. دا پداسې حال کې دی چې ددې ايالت په اکثرو تعلیمي ادارو کې په پښتو ویلو بندیز لګول شوی دی او زياتره ښوونځيو کې په پښتو ژبې لوست نه کیږي.
پاکستان کې مېشت افغان نرښځيان د قانوني اسنادو نه لرونکو پر ضد د پاکستان د حکومت وروستیو عملياتو پیلېدو راهیسې خورا ویریدلي او وایي چې د مقاماتو له ویرې کوڅو ته له وتلو ډډه کوي. دوي بيرته افغانستان ته ستنيدل نه غواړي او ادعا کوي چې ډیر نرښځيان افغانستان ته د ستنېدو وروسته بندیان شوي دي.
د پيېښور په ايډورډ کالج کې د پښتونخوا کلتوري ميله کې زده کوونکو د خپلو خپلو سيمو کلتوري خواړه، جامې او دوديز شیان نندارې ته وړاندې کړي و. د کالج ځينو نجونو د افغانستان مېرمنو او زده کوونکو څخه د ملاتړ په توګه د افغانستان کلتوري جامې اغوستې وې۔ شاهين افريدی- امريکا غږ
په خيبر پښتونخوا کې د شاتو افغان سوداګر وايي، چې د پنجاب د پوليسو له خوا ځورول کېږي چې له امله يې د شاتو فارمونو پلورلو ته اړ شوي دي. په پاکستان کې د شاتو په صنعت کې تر ۶۰ سلنې زیات افغان کډوال په کار بوخت دي.
په خېبر پښتونخوا کې د انسانانو د وېښتانو بازارونه دي چې پېرودونکي یې تر ډیره چینایان دي. د وېښتانو د روزګار سوداګر وايي، تر ټولو غوره او ګران ويښته د افغانستان او بيا د پښتونخوا د خلکو دي۔ دغه سوداګرو ته د کوڅو څخه کثافات راټولونکي خلک وېښتان راوړي او د يو کیلو په حساب ۱۵ زره کلدارو پورې یې پلوري
پېښور کې ډیر سوداګر وایي چې د افغان کډوالو له ستنېدو وروسته روزګار خورا ټکنی شوی. افغان سوداګر وايي، د ګرانۍ او د پولیسو د وېرې له امله په بازارونو کې ګڼه ګوڼه کمه شوې، چې په کاروبار یې ناوړه اغېز کړی دی. شاهین افریدي له ځينو افغان سوداګرو سره خبرې کړي دي
د بې اسنادو افغان کډوالو د ستنېدو لپاره په لنډي کوتل کې په جوړ شوي موقتي کمپ کې د لومړنیو اسانتیاوو د نشتوالي او د یخنۍ له امله ماشومان د کولرا او ښځې او مشران د سینه بغل په ناروغیو اخته شوي دي. دغو ستونزو ته په کتو، ځايي خیریه موسسې افغان کډوالو ته وړیا روغتیايي اسانتیاوې او خوراکي توکي برابروي.
په خيبر پښتونخوا کې د روان کال د نومبر له لومړۍ نېټې راهیسې د ناقانونه کډوالو د لټون عمليات پيل شوي دي. د دې عملیاتو د یوې برخې په توګه، پولیس د ښار په بیلابیلو لارو کوڅو کې تلاشي کوي چې له امله یې په پېښور کې میشت افغان کډوال د ناامنۍ احساس کوي.
په پېښور کې د 'افغان میټل مارکیټ' په نوم په ۷۵ کلن مشهور مارکيټ کې مسي لوښي جوړېږي، چې له لاهور او کراچۍ سربېره د نړۍ بېلابېلو هېوادونو ته صادرېږي. يو وخت د دغه مارکیټ ډېر پېرېدونکي افغانان وو او تر ۷۰ ډېرو ماهرو هنرمندانو پکې کار کاوه، خو اوس دلته يوازې پنځه کسبګر کار کوي.
د خيبرپښتونخوا دره آدم خيلو سيمه، چې د وسلو جوړولو د صنعت په وجه چې شاوخوا ۱۵۰ کلن زوړ تاريخ لري مشهوره وه، اوس د يو کتابتون د جوړیدو په خاطر نوره هم مشهوره شوی ده. دغه کتابتون ته ځوانان، ښوونکي او ماشومان د مطالعې لپاره ورځي.
نادیه قریشي، چې د پېښور اوسېدونکې ده، د چاپيريال د ساتنې لپاره کار کوي. هغه د زینتي بیلابیلو توکو د جوړولو لپاره پلاستیکي مواد زیرمه کوي او بیا یې کاروي. هغه نه یوازې د خپل هنر له لارې د چاپیریال پاکولو هڅه کوي، بلکې دا توکي آنلاین هم پلوري.
په پاکستان کې په ناقانونه توګه د مېشتو افغان کډوالو د اوسېدو نېټه پای ته ورسېده. اوس دوی په زوره ایستل کیږي. د دغو کډوالو لپاره تورخم ته څېرمه په لنډي کوتل کې یو موقتي کمپ جوړ شوی، چې تر ثبت او نوم لیکنې وروسته افغانستان ته استول کېږي.
په داسې حال کې چې په پاکستان کې د بې اسناده او غير ثبت شوي افغان کډوالو د شړلو موده پايي ته رسيدلی ده، زياتره افغان کډوال د کور خرڅ خوراک او افغانستان ته د تګ کرايې د پوره کولو دپاره کورني توکو پلورلو ته اړ شوي دي.
د افغانستان اصلی اوسیدونکی عبدالباسط چې د لوړو زده کړو تر بشپړولو وروسته یې غوښتل دکتورا ترلاسه کړي، خو په پاکستان کې د قانوني اسنادو د نه لرلو له امله، نه یواځې هغه، بلکې وروڼه او خويندې يي هم خپلې زده کړې په نيمايي کې پريښودلو ته اړ شوي دي.
په پاکستان کې د هوا د کیفیت وضعیت هر کال خرابیږي. د ۲۰۲۲م کال د نړیوالې هوا د کفیت راپور له مخې، پيښور پاکستان کې دویم تر ټولو ککړ ښار او په نړۍ کې پنځم ځای لري. دا پداسې حال کې ده، چې پاکستان په نړۍ کې د دریم تر ټولو ککړ هیواد په توګه درجه بندي شوی دی.
د خيبرپښتونخوا قبايلي سيمې لنډي کوتل ځايي خلکو د پښتو د نومیالي شاعر حمزه شینواري په نوم د خيبر درې په دنګو غرونو کې يو کتابتون جوړ کړی چې د کتابونو لوستلو لپاره د ليرې سيمو څخه ورته خلک راځي او ځینې لا همدلته شپې هم کوي۔ د امريکا غږ خبريال شاهين افريدD د دغه ځانګړي کتابتون په اړه راپور جوړ کړی.
د پاکستان حکومت وایي په غیرقانوني توګه اوسیدونکو هغو افغان وګړو لپاره موقتي کمپونه جوړوي چې په نږدو کې به بیرته افغانستان ته ستانه کړل شي. په پېښور کې د طالبانو د حکومت جنرال قونسل د پاکستان د سرپرست صدراعظم څخه غوښتي چې په دغه پريکړه د سره غور وکړي. او دا پریکړه یې غير انساني او د نه منلو وړ بللې۔
په پيښور کښي ځایي چارواکو د تجاوزاتو په ضد عملياتو کښي د بورډ بازار کې د افغانانو څه باندې ۷۰۰ کراچۍ او هټۍ ورانې کړې. دوی د سړک په غاړه په دغو کراچیو او هټیو کې کاروبار کاوه. د افغان سوداګرو په وینا ددغو کسانو له ډلې څخه یې ۲۰۰ څخه ډېر هغه افغانان دي چې د طالبانو له راتګ وروسته پاکستان ته تللي.
پېښور کې مېشت افغان خبريال جميل وصال د طالبانو لخوا پر رسنیو د محدوديتونو د وضع کیدو وروسته پاکستان ته کډوال شوی. نوموړی وايي، چې د پوليس لخوا د نیولو کیدو له ويرې په ازاده توګه کار نشي کولای.هغه وویل،په بيلا بيلو ځايونو کې د کار په لټه کې دی،خو د کار د نشتوالي له امله له اقتصادي ستونزو سره مخ دی.
د خیبر پښتونخوا د بونیر اوسېدونکی ۱۶ کلن رویداد علي، نن سبا په پېښور کې منجيلې پلوري او د خپلو زده کړو لګښت پرې پوره کوي. رويداد علي د نهم ټولګي په وروستۍ ازموينه کې د ښو نمرو په ترلاسه کولو سره په خپل ښوونځي کې عالي مقام خپل کړی او غواړي له لوړو زده کړو وروسته د سافټ ويير انجنير شي.
نور پورته کول