د افغانستان د کرکټ دوه لوبغاړي شاهپور ځدران او شفیق الله شفق چې د ځینو نامعلومو وجوهاتو له کبله د تېرو څو میاشتو راهسې د کرکټ په کورنیو او نړیوالو سیالیو کې نه لیدل کیږي، د هغوي په اړه د افغانسان د کرکټ بورډ اجرایوی ریس ویلي چې دوي څو ځله د شاهپور ځدران او شفیق الله شفق نه وغوښتل چې د کرکټ میدان ته مخه کړي ،خو هغوي ورته معذرت کړیدی. ښاغلي ستانکزي دا هم وویل چې شاهپور ځدران او د شفیق الله شفق د کورنۍ د غړیو سره ېې هم په دې اړه خبرې کړيدي چې نوموړي لوبغاړي دې ته حاضر کړي چې خپله میدانه ته راشي.هغه وايي چې دوي به بیا هم هڅه وکړي او هیله ده چې دواړه لوبغاړي د خپلو مینه والو دپاره د کرکټ میدان ته راشي.
ښاغلي شفیق ستانکزي د امریکا غږ اشنا راډیو سره خبرو کې دا هم ویلي چې د شهزاد محمدي چې پلار ېې تېره ورځ په حق رسیدلی، هغه خپل کور ته ستون شوی،او انگلستان خلاف څلور ورځنۍ سیالۍ کې برخه نه اخلي،خو شهزاد غواړي چې د راتلونکو ورځو کې د متحده عربي اماراتو سره شل اوریزو سیالیو کې ولوبیږي.
د ښاغلي ستانکزي په وینا افغانستان د دسمبر د میاشتې په اخري لسو ورځو کې د متحده عربي اماراتو سره درې شل اوریزې سیالۍ لري، چې هغې دپاره به ټیم ډیر زر اعلان شي. بیا به ملي ټیم کابل ته ستنیږي او د جنوري په څوارلسمه د اتو ملکونو د کرکټ ټیمونو ترمنځ شل اوریزو سیالیو دپاره بیا متحده عربي اماراتو ته ځي.
د افغانستان د کرکټ بورډ اجرایوي ریس دا هم وویل چې د افغانستان د کرکټ ملي،الف،نولس کلن او نور ټیمونه په داخلي او خارجي لوبو کې د کال ٢٠١٨ د جون پورې یو مصروف مهال ویش لري، چې دې کې د بشپړ غړتیوب ملکونو سره هم سیالۍ شاملې دي، چې وخت ځای او مقابل ټیمونه به ژر معلوم شي.
