د افغانستان د صنایعو او سوداګرۍ وزارت وایي چې ۲۰۱۸ کال په افغانستان کې د هوایي دهلېزونو له پرانیستې وروسته، د هوايي صادراتو کچه ۱۰۰ میلیون ډالرو ته ورسیده.
د دغه وزارت مالي او اداري مرستیال اجمل حمید عبدالرحمیزي د چهارشنبې پر ورځ د «مرغومې پر ۱۲مه» خبریالانو ته وویل چې د هوایي دهلېزونو له لارې په۴۰۶ پروازونو کې ۵۲۰۰ ټنه سوداګریز توکي بېلابېلو هېوادونو ته ولېږدول شول.
هغه وویل "د ۵۲۰۰ ټنه سوداګریزو توکو ارزښت سل میلیون ډالرو ته رسېږي، چې دا د سوداګرۍ په برخه کې یو ښه ګام دی".
زعفران، وچه او تازه مېوه هغه عمده توکي دي چې د هوایي دهلېزونو له لارې نړیوالو بازارنو ته صادر شوي دي.
افغانستان له بهرنیو هېوادونو سره دا مهال نهه هوایي دهلېزه لري.
افغانستان په لومړي ځل د کابل ـ ډهلي او کندهارـ امرتسر هوایي دهلېزونه د تېر کال په مرغومې میاشتې کې پرانیستل.
ښاغلي عبدالرحمیزي همدرانګه وویل، چې افغانستان دا مهال د هوایي دهلېزونو سربېره د صادراتو لپاره ځمکنۍ بدیلې لارې لري، چې ښه مثال یې د لاجوردو لار ده.
- اصلاحات او لاسته راوړنې
ښاغلي عبدالرحمیزي وویل، چې د ۲۰۱۸ کال په لومړیو نهو میاشتو کې د افغانستان صادرات ۱۹ فیصده ډېر شوي او دغه وزارت توانېدلی دی، چې خپله ۹۶ فیصده پراختیایي بودیجه مصرف کړي.
هغه وویل، چې افغان حکومت د سوداګرۍ د اسانتیا لپاره د سوداګرۍجواز له دېرش زره افغانیو څخه سل افغانیو ته ټیټ کړی دی.
هغه همدارنګه وویل، چې په ۲۰۱۸ کال کې حکومت د سوداګرو او صنعتکارانو لپاره په بېلابېلو ولایتونو کې ۱۲سوه هکټاره ځمکه ځانګړې کړې ده.
د صنعت او سوداګرۍ وزارت مرستیال وویل، چې دغه وزارت د سوداګرۍ د اسانتیا لپاره د خصوصي سکټور د پراختیا لپاره د لومړیتوبونو ملي برنامه وروستۍ کړې.
هغه وویل، چې دغه برنامه د پانګونې لپاره د امن چاپېریال، خصوصي سکټور ته د سوداګرۍ او ترانزیت منځته راوړلو او د پانګونې پر پراختیا متمرکزه ده.
