سږ کال یو وار بیا د بلخ ولایت هغو سیمو ته چې کوکنار یې حاصل ته رسیدلي په لسګونو هلمندي نیښګر ورغلي او وايي، چې د نیښ وهلو له لارې خپلو کورنیو ته روزي پیدا کوي.
بلخ ولایت ته هر کال د هلمند څخه د کوکنارو د نېښ وهلو لپاره په لسګونو نېښګر ورځي.
د بلخ ولایت په چمتال ولسوالۍ کې د هلمند څخه راغلي د کوکنارو په نېښ بوخت دغه نېښګر وايي چې نېښ وهل ددوی کسب دی.
یو هلمندی نېښګر صدیق الله وايي: " دلته په نېښ پسې راغلی یم. روزي په کې پیدا کوم. پنځلس ورځې دلته د کوکنارو نېښ وهم ".
صدیق الله وايي چې هغه د کوکنارو د نېښ په بدل کې د کوکنارو پنځمه یا شپږمه حصه حاصل اخلي.
د صدیق الله په وینا د کوکنارو کر او نېښ وهل یوازینی کار دی چې هغه یې کوي.
صدیق الله وایی چې د هغه لومړی کال دی چې بلخ ولایت ته په نېښ وهلو پسې راغلی دی، خو وایي چې د هغه ملګري هر کال د کوکنارو دنېښ وهلو لپاره بلخ ته راځي.
سږ کال د بلخ په مختلفو ولسوالیو کې د کوکنارو پراخ کر شوی دی او بل لورته کروندګر وايي، چې پدې وروستیو کې او وروسته له هغه راهیسې چې د طالبانو مشر د کوکنارو کر بند کړ د اپینو بیعه لوړه ختلې ده.