حماس د شنبې په ورځ اپریل ۲۷ (غوايي اتمه) خبر ورکړ چې په غزه کې د احتمالي اوربند په اړه د اسرائیل پر تازه وړاندیز باندې غور کوي. له دې یوه ورځ وړاندې یو مصری پلاوی د سولې د ځنډېدلو خبرو اترو د بیا پیلولو په نیت اسرائیل ته رسیدلی و.
په غزه کې د تازه اوربند په اړه د پرمختګ دا نښې په داسې حال کې څرګندیږي چې اسرائیل تېره شپه د غزې په جنوبي ښار رفح باندې لږ تر لږه درې هوایی بریدونه وکړل.
د حماس او اسرائیل ترمنځ د نږدې اوو میاشتو جګړو له امله په سلګونو زره بې ځایه شويو فلسطینیانو په رفح کې پناه اخیستې ده. د روغتون چارواکو وویل، په رفح او نورو ځایونو کې د تیرې شپې په بریدونو کې تر سلو زیات کسان وژل شوي دي.
په غزه کې د حماس د سیاسي څانګې مرستیال خلیل الحیا په یو بیان کې وویل: "نن د حماس غورځنګ خپل هغه دریځ ته چې د اپریل په دیارلسمه مصري او قطري منځګړو ته سپارل شوی و، د صهیونیستي اشغالګرو [اسرائیل] رسمي ځواب ترلاسه کړ. حماس به پر دغه وړاندیز غور وکړي او له بشپړیدو وروسته به خپل ځواب وړاندې کړي."
حماس تر دې مخکې پر دایمي اوربند ټینګار کړی و، چې د اسرائیل له خوا رد شوی و.
مصر، قطر او متحده ایالات د نومبر په میاشت کې د جګړې د لنډمهالې وقفې راهیسې په غزه کې د اوربند د نوي تړون لپاره هڅه کوي.
د نومبر میاشتې د یوې اونۍ اوربند په ترڅ کې، د اسرائیل په زندانونو کې د ۲۴۰ فلسطینیان د ۸۰ اسرائیلي یرغملو سره تبادله شول.
اسرائیلي او مصري رسنیو راپور ورکړی چې د مصر یو پلاوی د جمعې په ورځ اسرائیل ته ددې د پاره تللی چې د اوربند خبرې اترې بیا پیل کړي.
القاهره نیوز، چې د مصر له دولتي استخباراتي خدماتو سره تړاو لري، وویل: "د مصري او اسرائیلي پلاوي د نظرونو په همغږي کولو کې د پام وړ پرمختګ شوی دی."
د اپریل په لومړیو کې حماس ویلي وو چې په قاهره کې له خبرو وروسته په یو وړاندیز غور کوي. خو څو ورځې وروسته اسرائیل او حماس یو بل د سولې د خبرو اترو په کمزوري کولو تورن کړل.
هره ورځ مرګونه
په داسې حال کې چې په جګړه کې د وقفې دپاره خبرې روانې دي، په غزې کې د حماس د روغتیا وزارت وايي، هره ورځ لسګونه کسان په دغه تړانګه کې مري.
په غزې کې جګړه د حماس د اکتوبر اوومې له هغه بې ساري برید وروسته پیل شوه، چې د اسرائیلي شمیرو له مخې، شاوخوا ۱۱۷۰ زیاتره ملکي کسان پکې ووژل شول او ۲۵۰ نور یرغمل شول.
د روغتیا وزارت په وینا، په غزه کې د حماس د له منځه وړلو لپاره د اسرائیل د غچ اخیستونکو عملیاتو په ترڅ کې تراوسه لږ تر لږه ۳۴۳۵۶ کسان وژل شوي چې ډیری یې ښځې او ماشومان دي.
د غزې جګړه په سعودي عربستان کې د پیل کېدونکې یوې نړیوالې غونډې د اجنډا په سر کې ده.
د سعودي عربستان په پایتخت ریاض کې د نړیوال اقتصادي فورم په نوښت دا غونډه د یکشنبې په ورځ پیل کیږي او ټاکل شوې ده چې د دوشنبې په ورځ د غزې په اړه ځانګړی بحث وکړي.
په دغه غونډه کې د فلسطین نوی ټاکل شوی صدراعظم محمد مصطفی، د مصر صدراعظم مصطفی مدبولي او د غزې د پاره د ملګرو ملتونو د مرستو همغږی کوونکی سیګرید کاګ ګډون کوي.
فورم \ دبحث خونه