د متحدو ایالتونو ولسمشر ډونالډ ټرمپ د چهارشنبې په ورځ مارچ پنځمه (کب ۱۵) د حماس ډلې ته خبرداری ورکړ که پاتې یرغمل پرېنږدي او مړي یې انتقال نه کړي، له دردناکو عواقبو سره به مخامخ شي.
ټرمپ د خپل ایکس په ټولنیزې شبکې کې حماس ته په خطاب کې لیکلي دي: «شالوم حماسه. یانې سلام او خدای په امان. تاسو یې غوره کړئ. ټول یرغمل شوي همدا اوس ازاد کړئ وروسته نه او سمدستي د هغو خلکو مړي ستانه کړي چې تاسو وژلي دي، که نه ستاسو کار تمام دی.»
ټرمپ همدغه راز حماس ته په خطاب کې لیکلي دي: «یوازې ناروغ او بې لاري خلک او مړي یرغمل کوي، تاسو بې لاري او ناروغ یاست.» ولسمشر ټرمپ زیاته کړې ده: «دا ستاسو لپاره وروستی خبرداری دی.»
هغه د حماس مشرانو ته ویلي دي: «اوس د غزې د پرېښودو وخت دی، تاسو لا هم وخت لری. همدغه راز د غزې خلکو ته: تاسو ته ښکلې اینده منتظره ده، خو که یرغمل شوي مو وساتل، بیا نه. که مو دا کار وکړ، مړه یاست. ځېرکه پرېکړه وکړئ. یرغمل شوي اوس پرېږدئ، که نه بیا باید درنه بیه پرې کړئ.»
متحدو ایالتونو تائید کړې چې «په غزې کې د پاتې امریکايي یرغمل شویو د خلاصون په هڅې کې» یې د حماس له ډلې سره پټ مستقیم تماس نیولی دی.
د سپینې ماڼۍ ویاند د دغو مذاکراتو په اړه نور جزیات ورنه کړل، خو هغه یې «د امریکا د خلکو په ګټه» وبلل او ویې ویل چې له حماس سره د تعامل په اړه اسرائیل سره مشوره شوې ده.
د بنیامین نتنیاهو دفتر دا هماهنګي تائید کړې او ویلي دي چې «له حماس سره یې د مستقیمو اړیکو په اړه متحدو ایالتونو ته خپل دریځ څرګند» کړی دی.
د خبرو سرچېنو په حواله، د یرغملو په چارو کې د متحدو ایالتونو ځانګړې استازي ادم بویلر له حماس سره د مستقیمې مذاکرې لپاره له سپینې ماڼۍ څخه اجازه ترلاسه کړې او په دې وروستیو کې یې د حماس له مشرانو سره په دوحه کې لیدلي دي.
سرچېنې وایي چې د دغو مذاکراتو تمرکز په غزې کې د امریکایي یرغمل شویو په خلاصون و، خو د ټولو یرغمل شویو پرېښودل او اوږد مهال اوربند هم مطرح شوي دي.
حماس ویلي چې د یرغملو د خوشې کولو ترټولو غوره لاره د اوربند د تړون په اړه خبرې دي. حماس همدارنګه ویلي چې د ټرمپ له لورې ګواښونو اسرائیل هڅولی چې د جنوري په ۱۹مه د شوي اوربند له تړون څخه په شا شي.
حماس ته منسوب د ټلیګرام په حساب کې ددغه ډلې یو مشر سامي ابو زهري ویلي: "د ګواښ ژبه موږ نه وېروي خو مسائیل نور هم پیچلي کوي."
ټرمپ د چهارشنبې په ورځ په ټروت سوشل ټولنیزه شبکه کې ولیکل: "ټول یرغمل بې له درنګه، سمدستي خوشې کړئ او ژر تر ژره ټول د هغو کسانو جسدونه خپلو کورونو ته ستانه کړئ چې تاسو وژلي دي که نه دا به ستاسو انجام وي... زه اسرائیل ته ټول هغه څه لیږم چې د کار د بشپړولو لپاره ورته اړتیا لري. که زما له وینا سره سم اقدام ونکړئ، د حماس هیڅ غړی به په امن کې پاتې نشي."
واشنګټن په روانه اونۍ کې اسرائیل ته د څلور میلیارد ډالرو وسلې ولیږلې. دا په روانه میاشت کې دوهم ځل دی چې د کانګرس له تصویب پرته له امریکا څخه اسرائیل ته وسلې لیږل کیږي.
د امریکا او حماس خبرې یو نوی ډیپلوماتیک باب دی چې د حماس او اسرائیل ترمنځ له هغو مذاکراتو څخه جلا دی چې د قطر او متحده ایالاتو په منځګړیتوب په غزه کې د اوربند د تړون د غځولو لپاره روان دي.
د حماس او اسرائیل ترمنځ د شپږو اونیو اوربند ددې اونۍ په پیل کې پای ته ورسید. حماس د جمعې په ورځ، مارچ اوومه (کب ۱۷) وویل چې د اوربند د غځولو په هدف د خبرو لپاره یې یو پلاوی د مصر پایتخت قاهرې ته رسېدلی دی.
فورم \ دبحث خونه