د افغانستان جمهوري ریاست د ټاکنو د کمیسیون او ټاکنیزو شکایتونو د کمیسیون د دارالانشا مشران او غړي اعلان کړل.
دا نوي غړي له هغه وروسته وټاکل شول چې د افغانستان جمهوري ریاست د کمیسیونونو مخکني غړي "د خپلو کاري صلاحیتونو نه د ناوړه استفادې" په تور له دندو ګوښه کړل. دغه کسان د پلټنو تر بشپړ کیدلو پورې له افغانستان نه ممنوعالخروج اعلان شوي دي.
چې ګنې د انتخاباتو اړوند شکایتونه، تېروتنې او قضیې یې سم نه دي څېړلي او له خپلو دندو او صلاحیتونو څخه یې ناوړه استفاده کړې ده.
د ولسمشر غني د نوي فرمان په اساس چمن شاه اعتمادي د افغانستان د انتخاباتي شکایتونو د کمیسیون او حبیب الرحمن ننګ د انتخاباتو د کمیسیون د دارالانشا مشران ټاکل شوي دي.
همدغه راز د یو بل جلا فرمان له مخې "سید عصمتالله مل، مولانا محمد عبدالله، اورنګ زیب، محمد حنیف دانشیار، مسافر قوقندي، حوا علم نورستانۍ او رحیمه ظریفي" د انتخاباتو د کمیسیون غړي ټاکل شوي دي.
او "محمد قاسم الیاسي، زهره بیان شینواری، مولوی دینمحمد عظیمي، محمد یونس طغرا او سید قطبالدین رویدار" بیا د انتخاباتي شکایاتونو د کمیسیون غړي ټاکل شويدي.
د ارګ په فرمانونو کې راغلي دي چې د کمیسیونو نوي ټاکل شوي غړي مکلف دي چې په خپلې اولې غونډې خپل رئيسان، مرستیالان او منشیان وټاکي.
د جمهوري ریاست کاندیدانو، مدني ټولنو او نورو اړوندو ادارو ۸۴ کسان دغو څوکیو ته کاندید کړي وو چې ۱۴ یې وټاکل شول.
د افغانستان د جمهوري ریاست ټول ١٨ نوماندان ددغو کمیسیونونو د غړو د ټاکلو پر وخت د افغانستان د جمهوري ریاست په مقام کې حاضر وو.
نوي غړي له هغه وروسته ټاکل کیږي چې د افغانستان جمهوري ریاست د سیاسي گوندونو په مشوره د انتخاباتو په قانون کې یو لړ بدلونونه تصویب کړل چې د انتخاباتي کمیسیونو د غړو د ټاکلو څرنگوالی په کې شامل و.
