په ایتوپیا کې د یوې الوتکې له غورځېدو وروسته چین او اندونیزیا د ۷۳۷ بوینګ مکس الوتکو پروازونه ځنډولي دي.
د یکشنبې په ورځ (مارچ۱۰) د ایتوپیا له مرکز ادیس ابابا نه یوه ۷۳۷ بوینګ الوتکه تر پرواز لږه شېبه وروسته ولویدله او۱۵۷ کسان په کې مړه شول.
په ایتوپیا کې چارواکي وايي چې د الوتکې توره بکسه او د پیلوټ ثبت شوی غږ یې موندلی دی او د پېښې په اړه تحقیقات روان دي.
په تېرو شپږو میاشتو کې دا دویم ځل دی چې ۷۳۷ بوینګ الوتکه غورځيږي.
د تېرکال په اکتوبر کې هم یوه ۷۳۷ بوینګ الوتکه د جاکارتا له هوايي ډګر څخه والوتله او د جاوا په سمندر کې وغورځېده او ټول ۱۸۹ سپاره یې مړه شول.
د بوینګ ۷۳۷ الوتکه یوه مطمینه الوتکه بلل کیږي او د دغه شرکت تر ټولو ډېره پېرودل شوې الوتکه ده.
