د ناټو عمومي منشي ینس سټولټنبرګ وايي چې دا سازمان له افغانستان څخه خپل ملاتړ ته دوام ورکوي.
ښاغلي سټولټنبرګ د سېشنبې په ورځ د جولای ۲۷ (زمري ۵) په خپل ټویټر کې لیکلي چې د افغانستان له جمهور رئیس محمداشرف غني سره یې په ټیلیفون خبرې کړې دي.
ینس سټولټنبرګ ویلي: "ناټو له افغانستان څخه په مالي تمویل، غیرنظامي حضور او له هېواد څخه بهر د روزنې له لارې خپل ملاتړ ته دوام ورکوي".
د ناټو عمومي منشي د افغانستان امنیتي وضعیت "کړکېچن" بللی او ویلي یې دي چې له دې وضعیت څخه وتل د مذاکراتو پر سر توافق ته اړتیا لري.
له دې وړاندې هم امریکا او ناټو ټینګار کړی و چې افغان امنیتي او دفاعي ځواکونو ته به له افغانستان څخه بهر روزنه ورکړي.
د افغانستان جمهوري ریاست د دې ټیلیفوني اړیکې په تړاو تراوسه څه نه دي ویلي.
د متحده ایالاتو جمهور رئیس جو بایډن هم له دې وړاندې له ښاغلي غني سره په ټیلیفوني اړیکه کې له افغان امنیتي او دفاعي ځواکونو څخه د امریکا د ملاتړ ډاډ ورکړی و.
د افغانستان د جمهوري ریاست د ویاند مرستیال محمد امیري د دوشنبې په ورځ جولای ۲۶ (زمري ۴) وویل چې جمهور رئیس غني له افغان ځواکونو څخه د امریکا د ملاتړ د دوام د څرنګوالي په اړه د متحده ایالاتو د پوځ د مرکزي قوماندان له مشر جنرال کینټ مککینزي سره خبرې کړې دي.
