د پاکستان یوه اېف ۱۶ جنګي الوتکه د چهارشنبې په ورځ د مارچ په ۱۱مه (کب ۲۱) په پلازمینې اسلامآباد کې د تمرین پر مهال غورځېدلې او له منځه تللې ده.
سرچینې وايي چې الوتکه د اسلامآباد د شکر پړیا سیمې ته نږدې غورځېدلې او د الوتکې پیلوټ نعمان اکرم په کې خپل ژوند له لاسه ورکړی دی.
دغې الوتکې د مارچ ۲۳مې د پاکستان د ملي ورځې لپاره د چمتوالي تمرینات کول.
د پاکستان هوايي ځواکونو په یو بیان کې ویلي چې مرستندوی ځواکونه د پېښې ځای ته رسېدلي او سیمه یې کلابند کړې ده.
په بیان کې راغلي چې د الوتکې د غورځېدو لامل د معلومولو لپاره د پېښې په اړه پلټنې پیل شوي دي.
