د هلمند د ولایت په مرکز لښکرګاه کې د ملي امنیت د همکارو سرتیرو پر دفتر ځانمرګی برید شوی چې له امله یې لږ تر لږه لس تنه وژل شوي او لس نور ټپیان شوي دي.
تراوسه لا په دې پیښه کې د وژل شوو او ټپي شوو هویت څرګند نه دی.
پېښه نن غرمه ۱۲ بجې د لښګرګاه ښار د دوهمې حوزې په نمرو سیمه کې رامنځ ته شوې ده.
د هلمند د ولایتي روغتون یو ډاکټر امریکا غږ ته وویل، د پیښې له ځای څخه لس مړي او لس ټپیان روغتون ته وروړل شوي دي.
هلمند کې د پولیسو قوماندانۍ پېښه تائیده او امریکا غږ اشنا راډیو ته یې ویلي چې دا برید یوه پلي ځانمرګي برید کونکي ترسره کړی دي.
امنیتي چارواکي وایي، د چاودیدونکو توکو ډک یو کرولا ډوله موټر لاهم په دغه سیمه کې ولاړ دی او امنیتي ځواکونه په دغه موټر کې د ځای پرځای شوو چاودیدونکو توکو د شنډلو په هڅو بوخت دي.
دغه امنیتي چارواکي د نوم د نه ښودلو پر شرط امریکاغږ اشنا رادیو ته وويل چي په پېښه کې مرګ ژوبله هم شته خو دقیق شمېر يې لاهم څرګند شوی نه دی .
د پېښې یوه عیني شاهد روح الله امریکاغږاشنا رادیو ته وويل چي د پېښې په ځای کې یې د شپږو وژل شویو کسانو جسدونه لیدلي، خو هغه زیاتوي چې ممکن تلفات تر دې ډير وي.
په سیمه کې امنیتي چارواکي وایي چې په دغه برید کې د ملي امنیت د همکارو سرتیرو دفتر په نښه شوی دی.
د هلمند له تازه نا امنیو څخه را وروسته د ملي امنیت د ادارې په چوکاټ تازه سرتیري ګمارل شوي چي په هلمند کې ورته په عامه ژبه " سونګریان " وايي.
دغه سرتیري په شخصي جامو کې فعالیت کوي او د وسله والو طالبانو پر ضد په عملیاتو کې برخه اخلي.
تراوسه لا کومې ډلې ددغه برید مسولیت په غاړه نه دی اخیستی.
