افغان پوځ وايي چې له ننګرهار وروسته یې په پکتيا کې ډيورنډ کرښې ته څېرمه افغان ملي امنيتي او دفاع ځواکونو ګډ نظامي تطبيقات ترسره کړي دي.
په ګردېز کې د ۲۰۳ تندر قول اردو وياند ايمل مومند امريکاغږ ته وويل چې دغه پوځي تمرينونه تېره ورځ د پکتيا د آريوب ځاځي ولسوالۍ اړوند د ”مڼې جبې‟ په سيمه کې ترسره شول.
نوموړي وويل چې په دغو تطبيقاتو کې پياده ځواکونو، کمانډو، ضربتي، پوله ساتو او هوايي ځواکونو ګډون کړی و او د خپلو سپکو او درنو وسلو وړتيا يې وښودله.
ايمل مومند زياته کړه چې د وسله وال پوځ د ستر درستيز درستيزوال ډګر جنرال حبيب حصاري، د ۲۰۳ تندر قول اردو تورنجنرال ارکان حرب خان الله شجاع او د ملي دفاع وزارت يو شمېر نورو جنرالانو او آفسرانو دا تمرينونه له نږدې وڅارل.
د افغانستان د وسله وال پوځ د ستر درستيز درستيزوال ډګر جنرال حبيب حصاري په پکتيا کې د يادو نظامي تمرينونو پرمهال ويلي چې د افغان امنيتي ځواګونو ګډ تمرينات د افغاستان دوستانو او دښمنانو ته پيغام لري.
پر همدې مهال د افغانستان د ملي امنیت شورا ویاند جاوید فیصل پر خپل ټوېټر پاڼه د یادې ویډیو په خپرولو سره ویلي چې: "افغان امنیتي ځواکونو د کندهار په سپین بولدک ولسوالۍ کې د لوی اختر په شپه په سپین بولدک کې د پاکستان لخوا د شهید شوو افغان سرتیرو په نوم پوځي تمرینات تر سره کړل."
تر دې يوه ورځ مخکې د افغانستان ملي دفاع وزات د ننګرهار په ګوشتې ولسوالۍ کې ډيورنډ کرښې ته نږدې د افغان ملي امنيتي او دفاعي ځواکونو د ګډو نظامي تطبيقاتو د ترسره کيدو خبر ورکړ و.
افغانستان د وسله وال پوځ لوی درستیځ جنرال محمد یاسین ضیاء د دغه نظامي تطبیقاتو څخه د لیدنې پرمهال ویلي چې افغان دفاعي او امنیتي ځواکونه مسلکي او جنګي لوړ ظرفیت لري.
ښاغلي ضیاء ویلي و چې افغان دفاعي ملي امنیتي ځواکونه د "ځمکنۍ بشپړتیا او بهرني او داخلي دښمانانو په وړاندې په خپلواکه توګه دفاع کولای شي."
هغه زیاته کړې:"زموږ پیغام د افغانستان د ښمنانانو ته دادی، موږ ماتې نه خوړونکي، لوړ ظرفیت لرونکي او زړور ځواکونه یو.که چیري له جنګ نه لاس وانخلئ له منځه به یووړل شی."
