په هلمند ولایت کې د افغان امنیتي ځواکونو د همغږئ د دفتر مشرعبدالجبار قهرمان امریکاغږ اشنا رادیو ته وويل چې افغان امنیتي ځواکونو د ګډو عملیاتو په ترڅ کې نن سهار نهه بجې د دغې ولسوالۍ مرکز تر خپل واک لاندې را وست خو ښاغلي قهرمان وویل چې لاهم په دغه ولسوالۍ کې چانیز عملیات دوام لري.
په هلمند ولایت کې د افغان امنیتي ځواکونو د همغږئ دفتروویل، چې په دې جګړه کي وسله والو مخالفینو ته مرګ ژوبله هم اوښتې ده ، خو هغه د وژل شوو او ټپیانو دقیق شمیر څرګند نه کړ.
د ۲۱۵ میوند قول اردو ویاند ډګرمن سردار محمد ځاځي امریکا غږ اشنا رادیو ته وويل، چې په دې عملیاتو کي د ملي اردو درې سرتیري هم ټپیان شوي دي.
په کابل کې د افغانستان د کورنیو چارو وزارت هم امریکا غږ ته د خانشین د ولسوالۍ بیرته نیول تائید کړي دي.
ددغه وزارت د ویاند مرستیال نجیب دانش امریکا غږ ته وویل چې افغان امنیتي ځواکونو د خانشین د ولسوالۍ د بیرته نیولو لپاره عملیات تیره شپه پیل کړي وو
د خانشین ولسوالۍ نږدې درې اونۍ وړاندې د افغان حکومت وسله والو مخالفینو تر سختې جګړې وروسته تر خپلي ولکې لاندې را وستې وه.
تراوسه د افغان حکومت وسله والو مخالفانو د خانشین ولسوالۍ د عملیاتو او د هغوی له لاسه د دغې ولسوالۍ د وتلو په باب تبصره نه ده کړې.
خانشین د هلمند په جنوب کي د ډیورنډ کرښې ته نږدې پرته ولسوالۍ ده چې په تیرو څلورو میاشتو کې دوه ځلې د افغان امنیتي ځواکونو له لاسه وتلې او بیرته دغو ځواکونو نیولې ده.
د ارزګان چارچینو کې جګړه
بلخوا د هلمند د ولایت په ګاونډ کې د ارزګان ولایت د چارچينو په ولسوالۍ کې د افغان امنیتي ځواکونو او د وسله والو مخالفانو ترمنځ د سختو جګړو وروسته د دغې ولسوالۍ د توغي او رېګي په سیمو کي وسله والو مخالفانو د افغان پولیسو اوه پوستې نیولي دي.
د افغانستان په جنوبي ولایتونو کې د ۴۰۴ میوند زون د پوليسو قومندان تورنجنرال نبي جان ملاخیل امریکاغږ اشنا رادیو ته وويل چې دوی د نن سهار راهیسې دچارچينو په ولسوالۍ کې د امنیتي قواوو له لاسه د وتلو سیمو د بیرته نیول کیدو لپاره د افغان ځواکونو ګډ پوځي عملیات پيل کړي دي .
وسله والو طالبانو د اروزګان د جګړې په اړه رسنیو ته په لیږلي پیغام کې ادعا کړې چې تر ۱۵ پوري يې امنيتي پوستې له افغان ځواکونو څخه نیولي دي .
