په عراق کې دوو امنیتي سرچینو رویټرز خبري اژانس ته ویلي، لږ تر لږه نهه عراقي فدرالي پولیس د یکشنبې په ورځ ډسمبر ۱۸ (لیندۍ ۲۷) وروسته له هغه ووژل شول چې د تیلو بډایه ښار کرکوک په جنوب لویدیځ کې د دوی په کاروان باندې بمي چاودنه وشوه.
سرچینې وویل، چاودنه د صفرا کلي ته څېرمه شوې، چې د کرکوک په جنوب لوېدیځ ۳۰ کیلومترۍ کې پروت دی. منبع وایي چې په چاودنه کې دوه نور پولیس سخت ټپیان شوي دي.
د عراق صدراعظم محمد شیعه السوداني د برید کوونکو "ترهګرو عناصرو" د لټون امر کړی او د فدرالي پولیسو قوماندان یې د نورو تحقیقاتو لپاره سیمې ته استولی دی.
سمدستي د چاودنې مسولیت کوم کس یا ډلې په غاړه ندی اخستې، خو په سيمه کې د اسلامي دولت (داعش) وسله وال فعاليت لري. عراق د ۲۰۱۷ کال په ډسمبر کې د امریکا په مشرۍ د ایتلافي ځواکونو په مرسته د داعش ډلې پر وړاندې په جګړه کې بریا اعلان کړه. داعش په ۲۰۱۴ د دغه هېواد لویه برخه اشغال کړې وه.
د عراق د پولیسو منصبدارانو ویلي چې د اسلامي دولت وسله وال په دغه برید کې لاس لري او د سړک د غاړې بمونه یې د هغو پولیسو په نښه کولو لپاره کارولي چې په سیمه کې یې ګزمه کوله.
په ۲۰۱۷ کې د اسلامي دولت د وسله والې ډلې له ماتې وروسته د دې ډلې پاتې شونو د عراق په بیلابیلو برخو کې د حکومتي ځواکونو په وړاندې بریدونو او غلچکیو حملو ته مخه کړې ده. د داعش پاتې شوني د عراق په یو شمېر سیمو کې لا هم فعال دي.
داعش په ۲۰۱۹ کال کې د عراق پولې ته څېرمه په سوریه کې هم خپل وروستی مرکز له لاسه ورکړ.
د امریکا په مشرۍ د داعش ضد ایتلاف د تېر کال تر ډسمبر پورې په عراق کې خپل جنګي رول پای ته ورساوه، خو شاوخوا ۲۵۰۰ امریکايي پوځیان لا هم په دغه هېواد کې د روزونکو په توګه پاتې دي.
د ملګرو ملتونو د روان کال د یو خپور شوي راپور له مخې، د یو لړ ماتو او موانعو سره سره داعش اوس هم کولی شي د ۶۰۰۰ څخه تر ۱۰۰۰۰ پورې جنګیالیو استخدام کړي چې د عراق او سوریې د پولې دواړو غاړو ته بریدونه ترسره کړي.
د عراق د دفاع وزارت ویلي چې د چهارشنبې په ورځ د بغداد په شمال کې پر یو پوځي موټر باندې د سړک د غاړي د بم په چاودنه کې درې عراقي عسکر ووژل شول. خو سره له دې چې پدې سیمه کې د داعش پاتې شوني شتون لري، ددې برید مسولیت سمدستي چا په غاړه ندی اخیستی.
یوې پوځي سرچینې ویلي، تېره میاشت کرکوک ته څېرمه د عراق په شمال کې پر یوه لېرې پرتې پوځي پوسته باندې د ماشیندارې په برید کې څلور سرتېري ووژل. خو سمدستي ددې پېښې پړه هم چا پر غاړه نه ده اخيستې.
