د کرکټ د نړیوالې شورا د ۲۰ اورونو د نړیوال جام د ۱۲ ټیمونو د مرحلې په لومړنۍ سیالۍ کې اسټرالیا د جنوبي افریقا لوبډلې ته ماتې ورکړه.
جنوبي افریقا اسټرالیا ته د ۱۱۹ منډو هدف ټاکلی و چې د لوبې په شلم اور کې پداسې حال کې پوره شو چې د اسټرالیا پنځه لوبغاړي سوځیدلي وو.
د لوبې غوره لوبغاړی د اسټرالیا چټک توپ اچونکی جاش هیزلوډ وټاکل شو. هغه په څلورو اورونو کې یوازې ۱۹ منډې ورکړې وې او د سیالې لوبډلې دوه لوبغاړي یې سوځولي و.
سره لدې چې د اسټرالیا د سر درې لوبغاړي د ډیر لږو منډو جوړولو وروسته وسوځیدل خو د مارکوز سټاینیس او میتیو ویډ تر منځ په ګډه د ۴۰ منډو کولو له کبله اسټرالیا وتوانیده چې د جنوبي افریقا نسبتاً د کمو منډو هدف ورپوره کړي.
پچه د اسټرالیا لوبډلې ګټلې وه خو د منډو کولو لومړی نوبت یې سیالې لوبډلې ته ورکړ.
لوبه د عربي متحده اماراتو د ابوظهبي په لوبغالي کې وشوه.
د ۲۰۲۱ کال د ۲۰ اورونو د نړیوال جام پدغې مرحلې کې ټولې ۱۲ لوبډلې برخه لري چې په دوو ګروپونو ویشل شوي.
اسټرالیا او جنوبي افریقا د ویسټ انډیز، انګلستان، بنګله دیش او سریلانکا سره په لومړي ګروپ کې دي. د همدې ګروپ دویمه لوبه هم نن د ویسټ انډیز او انګلستان د لوبډلو تر منځ ده.
ویسټ انډیز تیر ځل د دې جام اتلولي ګټلې وه.