ټاکل شوې د متحده ایالاتو جمهور رئیس جو بایډن بله اونۍ د لومړي ځل لپاره په سپینې ماڼۍ کې د "کواډ" هیوادونو د مشرانو سره مخامخ وګوري.
ښاغلي بایډن د مارچ په میاشت کې د جاپان، اسټرالیا او هند د مشرانو سره آنلاین غونډه کړې وه او د کویډ-۱۹ بیمارۍ پر ضد د واکسین په جوړولو او د اقلیم بدلون سره په مبارزې یې د نږدې همکارۍ ژمنه کړې وه.
دغو مشرانو همدارنګه په غونډې کې د دې ډاډ ورکړی و چې د هند-آرام سمندر سیمه دې د چین لخوا د متوجه ستونزو په مقال کې آزاده او پرانیستې وي.
د سپینې ماڼۍ ویاندې جین ساکي ویلي چې د اسټرالیا د صدراعظم سکاټ موریس، د جاپان صدراعظم یوشیهیدا سوګا او د هند د صدراعظم نریندرا مودي سره ملاقات به په سپینې ماڼۍ کې وي.
میرمن ساکي ویلي چې د دې هیوادونو د مشرانو کوربه توب د هند – آرام سمندر د سیمې سره د بایډن –هریس د ادارې لومړيتوب څرګندوي چې د ۲۱ مې پیړۍ د ستونزو لپاره د څو ملتي حل لارې ولټول شي.
د "کواډ" هیوادونه د همکارۍ د ډیریدو په لټه کې دي چې هدف یې په سیمه کې د چین د هلو ځلو مخه ډب کول دي.
د امریکا جمهور رئیس بایډن چې په کور دننه هم د زیربناوو د لویو پروژو پلي کول غواړي، د همدې روان ۲۰۲۱ کال د مارچ په میاشت کې د بریتانیې د صدراعظم بوریس جانس ته ویلي و چې دیموکراتیک هیوادونه باید د چین د یو کمربند یو سړک د نوښت سره د مقابلې لپاره د زیربناوو د جوړولو نوښت وکړي.
د سپینې ماڼۍ ویاندې ویلي چې دا ځل به په ملاقات کې د مشرانو تمرکز د کویډ-۱۹ بیمارۍ پر ضد په مبارزې کې د همکارۍ ډیروالي، د اقلیم د بحرانو چاره کولو، د نویو غوړیدونکو ټکنالوژیو په برخې کې ګډ کار کولو، هوایي فضا او د آزادې او پرانیستې هند-آرام سمندر سیمې ترویج کولو باندې وي.
ټاکل شوې چې دا مشران به د افغانستان په هکله هم خبرې وکړي.
د افغانستان نه په "بې نظمه" توګه د امریکایي ځواکونو د راایستلو له کبله په جمهور رئیس جو بایډن سخت انتقادونه شوي خو امریکایي چارواکي وایي چې د امریکا تر ټولو د اوږدې جګړې پای ته رسول به حکومت ته اجازه ورکاندي چې د چین اړوند موضوعاتو ته پام او امکانات ډیر شي.