د پاکستان د کرکټ مینه والو له امریکا څخه ماتې 'توره ورځ' بللې

د پاکستان د کرکټ مینه والو په نړیوال جام کې کوربه متحده ایالاتو ته د خپل ټیم د لوبې بایلل تاریخي شاتګ او "توره ورځ" بللې ده.

دا ۲۰ اوریز نړیوال جام د ویست انډیز او متحده ایالاتو په ګډ کوربه توب ترسره کیږي او متحده ایالاتو پکې د پنجشنبې په ورځ جون شپږمه (غبرګولي ۱۷) له پاکستان څخه لوبه په "سوپر اوور" کې وګټله.

د کراچۍ ښار اوسیدونکی او د بانک متقاعد کارکوونکی راجو جمیل چې ددغه لوبې د لیدلو لپاره یې شپه په ویښه تېره کړې، وايي: "ډیر سخت خفه یم. دا ډیر د شرم ځای دی او باید ددې ماتې په اړه جدي پلټنه وشي. "

په دې جام کې متحده ایالات په لومړي ځل برخه اخلي، په داسې حال کې چې پاکستان په ۲۰۰۹ کې دا جام ګټلی او په ۲۰۲۲ کې د جام پایلوبې ته رسیدلی و. د امریکا په لاس د پاکستان ماتې د کرکټ په تاریخ کې یوه ترټولو سخته ماتې بلل شوې ده.

د پاکستان د جیو تلویزیون د سپورت شنونکي سکندر بخت وویل: "د پاکستان د کرکټ لپاره تر دې بله ستره ماتې نشي کیدای. دا داسې مثال لري لکه پاکستان په باسکټبال کې امریکا ته ماتې ورکړي."

کرکټ چې په پاکستان کې ترټولو مشهور سپورت دی، په امریکا کې عام ندی او له همدې کبله زیاتره امریکایان د خپل دغه بري په اړه بې خبره او یا بې حسه پاتې دي.

امریکايي رسنیو ددغه بري په ارزښت باندې د ځايي خلکو د پوهولو لپاره د بېسبال مثالونه وړاندې کړي دي چې په امریکا کې مشهوره لوبه ده.

خو د پاکستان د لوبډلې مینه والو په لوی شمېر د تلویزیون پردو ته په دې تمه شپه تېره کړې چې لوبډله به یې په اسانه دا لوبه وګټي.

پخواني توپ وهونکي باسط علي د جمعې ورځ "د پاکستان د کرکټ توره ورځ" وبلله او پړه یې د پاکستان د لوبډلې د کپتان بابر اعظم له خوا د لوبغاړو پر ناسم انتخاب واچوله. هغه وویل: "هغه تل ځان ته نږدې لوبغاړي غوره کوي او له کبله یې د پاکستان د بري چانس کم شوی دی."

د پاکستان پخوانی ویکټ ساتونکي کامران اکمل وویل: "زه فکر کوم چې زموږ کرکټ تر دې بله بده ورځ نده لیدلې."

د پایتخت اسلام اباد په یو مارکیټ کې ۳۸ کلن امجد عباسي په کرکټ کې د پاکستان د لسیزو تجربه او امریکا سره پرتله کړه چې تازه یې کرکټ پیل کړی دی. هغه وویل: "زموږ کرکټ کمزوری شوی د لوبو له لیدلو څخه یې خوند نه اخلم. د دوی کارکردګی خواشینوونکې ده. په هغه ډول چې دوی په پای کې لوبه کوي، زموږ لپاره سپکاوی دی."

د متحده ایالاتو د ټکساس ایالت د ډالاس په نړیوال لوبغالي کې په دغه لوبه کې، پاکستان په ۲۰ اورونو کې امریکا ته د ۱۵۹ منډو هدف ورکړ او د امریکا لوبډلې هم ۱۵۹ منډې وکړې او خبره "سوپر اوور" ته ووتله.

په کرکټ کې "سوپر اوور" یوه اصطلاح ده، چې کله د دواړو لوبډلومنډې مساوي شي نو د نتیجې معلومولو لپاره د شپږو-شپږو توپونو اضافي لوبه کیږي.

امریکا په سوپر اوور کې پاکستان ته د ۱۹ منډو هدف وټاکه، خو پاکستان یوازې ۱۳ منډې وکړې او لوبه یې وبایلله.

په اسلام اباد کې ۵۴ کلن حکومتي کارکوونکي دلشاد اختر وویل: "باور نه کوم چې موږ دې داسې خرابه لوبه وکړو." هغه زیاته کړه، داسې ښکارېدله لکه پاکستان چې تازه لوبه پیل کړې وي او امریکا د نړیوالې کچې لوبډله وي.