ځايي حکومتي چارواکي وايي چې د پکتيا ولايت په ډنډ پټان ولسوالۍ کې د سړک غاړې ماين چاودنې څلور ولسي پاڅونوال او يو ملکي وګړی وژلي دي.
د ډنډ پټان ولسوال عيد محمد احمدزي امريکاغږ ته وويل چې دغه چاودنه تېر ماښام شاوخوا شپږ بجې د يادې ولسوالۍ د نري کوتل په سيمه کې د پاڅونوالو پر اکمالاتي رېنجر موټر شوې ده.
نوموړي وويل چې څلور واړه پاڅونوال په رېنجر موټر کې سپاره وو او ملکي وګړی پلی روان و چې د چاودنې په نتيجه کې ووژل شول.
د ولسوال عيدمحمد احمدزي په وينا دغه موټر په سيمه کې د ولسي پاڅونوالو امنيتي پوستو ته اکمالات کول چې له يادې پېښې سره مخ شوی دی.
تر اوسه د دې بمي چاودنې مسؤليت چا پر غاړه نه دی اخيستی او نه هم وسله والو طالبانو په دې اړه څه ويلي دي.
