د جرمني حکومت نن دوشنبه مارچ ۱۴ (کب ۲۳) وویل چې په اوکراین باندې د روسیې د یرغل په ځواب کې به د امریکا د متحدو ایالتونو څخه لسګونه ۳۵-اف جټ الوتکې وپیري.
د جرمني دا اقدام د دغه هېواد د پوځ د عصري کولو یوه برخه ده چې میلیاردونه ډالر پرې لګول کېږي.
برلین غواړي چې خپلې تورنېدو الوتکې، چې څو لسیزې زړې دي، د امریکا د اف-۳۵ الوتکو او د یوروفایټر په الوتکو بدلې کړې.
جرمني وايي له امریکا څخه به ۳۵ اف-۳۵ او ۱۵ یوروفایټر الوتکې وپیري.
د جرمني د دفاع وزیرې کرستین لمبریک دا د خپل هېواد د پوځ لپاره یو ښه ګام ګڼلی دی.
د جرمني د هوايي ځواکونو قومندان جنرال انګو ګیرهارتز خبریالانو ته وویل چې «د پوتین یرغل ته فقط یو ځواب شته، د ناټو اتحاد او باوري مخنیوي».
د جرمني د تورنېدو الوتکې یوازینۍ الوتکې دي چې په دغه هېواد کې د مېشتو امریکایي ځواکونو د اتومي بمونو د انتقال اجازه لري. دا الوتکې د ناټو ځواکونو مهمه برخه هم ګڼل کېږي.
د امریکا اف-۳۵ الوتکې په نړۍ کې عصري جنګي الوتکې بلل کېږي چې نایابه بڼه او داسې رنګ لري چې دښمن یې په اسانه لیدلای نشي.
د امریکا د یورو فایټر الوتکي بیا په الکترونیکي جګړو کې اغیزناکې دي او د دښمن د هوايي دفاع د سیستم په غیر فعالولو کې مهم رول لوبولای شي.
د جرمني صدراعظم اولا شولتز تېره میاشت وویل چې د خپل هېواد د ځواکونو د عصري کولو لپاره به د ۱۱۲ میلیارد ډالرو د موجوده بودیجې سربېره، په دې برخه باندې نوره پانګونه هم کوي.
روسیې د فبروريپه ۲۴ په اوکراین باندې یرغل پیل کړی چې تر دې دمه په کې د دواړو خواو زرګونه عسکر وژل شوي او ژوبل شوي دي.
امریکا، جرمني دناټو نورو غړو هېوادونو د روسیې دا برید غندلی دی، له اوکراین سره یې پوځي او غیر پوځي مرستې کړې او ویلي دي چې د ناټو د غړو هېوادونو له لوېشت لوېشت ځمکې څخه به دفاع کوي.
