د ډنمارک د ښځينه فوټبال ټیم افغانه لوبغاړې نادیه ندیم به د راتلونکي فصل تر پایه د ايټالیا د اې سي میلان فوټبال کلب د ښځینه فوټبال لوبډلې لپاره لوبه وکړي.
د اې سي میلان فوټبال کلب د جنورۍ ۲۷ (سلواغۍ اوومه) پر خپل ایکس پاڼې کې د میرمن ندیم سره د نوي تړون په هکله ویلي، چې دغه کلب خوښ دی چې د نادیه ندیم سره د نوي تړون خبر اعلانوي.
همدارنګه د اروپا د فوټبال دغه مشهور کلب، اغلې ندیم ته د هر راز همکارۍ ډاډ ورکړی او ویلي یې دي ، چې دغه ورزشکاره به د اې سي میلان د ښځینه فوټبال ټیم، اتم نمبر کمیس اغوندي.
اغلې ندیم په ۱۹۸۸ کال کې په هرات ښار کې زېږېدلی او د ډنمارک د ښځینه فوټبال ملي لوبډلې له مهمو لوبغاړو څخه شمېرل کېږي.
نوموړې د یوې مسلکي فوټبالرې په توګه د پورټلنډ نورنز، مانچسټر سیټي، فورټونا هیوینګ، پاریس سینټ-جرمن او ریسینګ لوئس ویل لوبډلو لپاره د لوبیدو کارنامه لري.
نادیه ندیم په ۱۹۹۸ کال کې؛ د طالبانو د واکمنۍ په لومړۍ دوره کې د خپل پلار له وژل کېدو وروسته له خپلې مور او خویندو سره له افغانستانه ووتل. هغه په ۲۰۰۰ م کال کې له خپلې کورنۍ سره ډنمارک ته ورسیدې او هلته یې خپل نوی ژوند پیل کړ.
دغه ۳۶ کلن مسلکي لوبغاړې د اې سي میلان او 'ریسینګ لوئس ویل' لوبډلو ترمنځ د دوستانه سیالیو کې د لوبېدو تجربه هم لري.
فورم \ دبحث خونه