په بغلان کې چارواکي وايي د تېرو څو ورځو جګړو او د افغان ځواکونو د ځينو پوستو له سقوط کېدو وروسته سلګونو عامو خلکو وسله اخیستې او وايي چې د دولت په ملاتړ به له طالبانو سره په جګړه کې برخه واخلي.
په بغلان کې د وروستیو جګړو په نتیجه کې د زاړه بغلان بازار او د بورکې ولسوالي د طالبانو په لاس سقوط شول، چې په نتیجه کې یې د نهرین، اندراب، خنجان، خوست و فرینګ سیمو اوسیدونکو وسله اخیستې د پلخمري ښار کې ځای پر ځای شوي دي.
وسله وال شوي خلک وايي چې طالبان باید جګړه کمه کړي، د سولې او خبرو له لارې ستونزو ته د حل لارې ولټوي. وايي که طالبان جګړې ته دوام ورکوي دوی د خپل دولت په ملاتړ هر ډول قربانۍ ته اماده دي.
یو ولسي مسلح شوي کس وویل: «مخکې له دې که طالبان کوم تصمیم ولري دوی د ولسي پاڅون وسله والو د پلخمري شاوخوا درې امنیتي پوستې جوړې کړي دي، په مقابل کې یې دریږي او د خپل حکومت او خلکو څخه دفاع کوو.»
د ولسي پاڅون کوونکو دغه ډله د ملي امنیت په چوکاټ کې تنظیم شوي او د ضرورت په وخت کې به ترې استفاده کیږي.
د بغلان مرستیال والي ذبیح الله احساس وايي چې یو شمېر خلک چې د ملي امنیت په چوکاټ کې تنظیم شوي دي، د وروستیو ناامنیو په نتیجه کې یې د مخالفینو پر وړاندې وسله اخیستې او د ضرورت په وخت کې به ترې ګټه واخیستل شي.
د بغلان یو شمېر اوسېدونکي وايي چې زاړه ښار کې اوس هم طالبان حاکم دي او افغان قواوې د شپې له خوا پر مخالفینو بمبار کوي.
د بغلان پولیس وايي چې طالبانو ته یې په جګړه کې درنه مرګ ژوبله اړولې او د سیمې د بیرته ترلاسه کولو لپاره له کابل او مزارشریف څخه ځانګړې قواوې رسیدلي دي.
