د هند د غوره لیګ یا آی پي ایل تجارتي کرکټ سیالۍ نن د عربي متحده اماراتو د ابوظبي په ښار کې پیل شوې.
ټاکل شوې وه چې دا لوبې د ۲۰۲۰ کال د مارچ په میاشت کې په هندې کې شوې وای خو د کرونا د وبا له وجې وځنډیدې او د هند په ځای به د عربي متحده اماراتو په بیلا بیلو ښارونو کې کیږي.
د آی پې ایل په دیارلسم دور سیالیو کې د تیرې دورې په څیر اته لوبډلې برخه لري چې د نړۍ د کرکټ مشهور لوبغاړي پکې لوبېږي.
د آی پي ال د رسمي ویبسایټ د معلوماتو په اساس د سږ کال لومړني لوبه د چنای سوپر کنګز او مومبای انډینز د لوبډلو تر منځ کیږي. د چنای کپتان مهندرا سنګ دوني او د مومبای کپتان روهیت شرما دی.
د کرونا د وبا له وجې به د آی پي ایل په سیالیو کې نندارچیان د لوبې په میدان کې نه وي او دا ځل د لوبو د پیل مراسم هم نه وو نیول شوي. دا ځل به د لوبې په میدان کې د لوبغاړو او مینه والو د تشویق لپاره نڅاګرې هم نه وي.
د افغانستان د کرکټ د ملي لوبډلې درې لوبغاړي، محمد نبي، راشد خان او مجیب الرحمان د سږ کال د آی پي ایل په سیالیو کې برخه لري.
نبي او راشد د سنرایزر حیدرآباد او مجیب د کنګز ایلیون پنجاب د لوبډلې لپاره لوبه کوي.
د تیر کال آی پي ایل اتلولي د مومبای انډینز لوبډلې ګټلې وه.
