هندي او ایراني چارواکو ویلي چې دواړه خواووې به په ګډه په افغانستان کې د سولې د راوستلو لپاره خپلې همکارۍ زیاتې کړي.
د ایران ولسمشر حسن روحاني چې د دري ورځني سفر لپاره په نوي ډهلي کې دی، نن د هند له ولسمشر او صدراعظم سره ولیدل.
له صدراعظم نریندار مودي سره په لیدنې کې ولسمشر روحاني او هندي چارواکو له ترهګرۍ، افراطیت او د نشه يي توکو د قاچاقو پر ضد د دوه اړخیزو همکاریو پر پراختیا موافقه وکړه.
روحاني وایې چې له هندي چارواکو سره یې موافقه کړې چې "افغانستان باید خوښ او امن هېواد ووسي."
دارنګه د هند صدراعظم وویل: "موږ به په افغانستان کې د سولې، ثبات، سوکالۍ او د ټولو خلکو په شمول د یو سیسټم د رامنځته کولو لپاره کار وکړو."
صدراعظم مودي وویل چې نوی ډهلی او تهران غواړي چې نړۍ او سیمه له ترهګرۍ څخه پاکه وي.
صدراعظم مودي زیاته کړه چې دواړه هېوادونه د انرژۍ او امنیت د تقویې او د چهابهار بندر له لارې افغانستان او منځنۍ آسیا ته د رسیدو لپاره به د سیمې په کچه خپلې همکارۍ زیاتې کړي.
په ۲۰۱۶ کال کې هند، ایران او افغانستان د ایران په چاه بهار بندر کې د یوه تجارتې لارې په جوړولو موافقه وکړه.
هند ژمنه کړې چې د چابهار بندر پر پراختیا او نورو مربوطه بنسټیزو پروژو ۵۰۰ میلیونه ډالر لګوي.
روحاني په داسې یو وخت کې هند ته سفر کړی دی چې د امریکا ولسمشر ډونالډ ټرمپ له نړیوالو قدرتونو سره د تهران د اټومي پروګرام له موافقې څخه د واشنګټن د په شا کېدو خبرداری ورکړی دی.
د ایران او امریکا ترینګلو اړیکو هند چې په سیمې کې د واشنګټن یو ستر ملګری دی، له یو پیچلي حالت سره مخامخ کړی دی.