ایران د ١٩٧٩ کال د اسلامي انقلاب د کلیزې د لمانځلو په مراسمو کې نوی کروز میزایل وښود چې ١٣٠٠ کیلو متره واټن ویشتلی شي.
په ویډیو کې چې د ایران د دفاع وزارت په ویبپاڼه خپره شوې په یو دښته کې ددغه میزایل آزمایښت ښکاري.
د ایران د دفاع وزیر جنرال امیر حاتمي د ایران د دولتي تلویزیون له لارې پخه یوه وینا کې وویل چې دغه توغندي د ١٢٠٠ کیلومتره واټن له وهلو وروسته په هدف لگیدلی دی.
هغه توغندي چې ایران یې لري تر ٢٠٠٠ کیلومتره واټن پورې رسیدلی شي چې په سیمه کې د اسرائیل او امریکا د پوځي اډو په نښه کولو توان لري.
خو کارپوهان پدې باور دي چې ایران اکثر د خپل پوځي توان په اړه مبالغه کوي، خو بیا هم د ایران د لیرې واټن ویشتونکو بالستیک میزایلو په هکله اندیښنې شته.
امریکا د ایران د بالستیک میزایلو د پروگرام پر وجه پر هغه هیواد باندې بندیزونه سخت کړي او پدې وروستیو کې یې ایران ته د دریو توغندیو د ازمایلو د پروگرام په وجه خبرداری ورکړی دی.
د ایران پوځي لاسته راوړنې چې د رسنیو له لارې یې اعلانوي د خپلواکو منابعو له لورې ندي تائید شوي.
