د امریکا په متحده ایالتونو کې یوازې په تیره یوه اوونۍ کې څه باندې ۱،۳ میلیونو کسانو د وزګارۍ مرستو ته درخواستونه ورکړي دي.
له دې ارقامو څخه معلومیږي چې اوس هم ګڼ شمیر دفترونه او د کار و بار خاوندان د کروناویروس له امله خپل کار کوونکي رخصت کوي.
دغه شمیر په داسې حال کې زیاتیږي چې د امریکا شپږ ایالتونه اړ شول د کرونا ویروس د مثبتو پيښو د ډیریدو له امله د تجارت او کار و بار د بیرته پرانیستلو پروسه ودروي.
دغه شپږ ایالتونه، اریزونا، کالیفورنیا، کولراډو، فلوریډا ،میشیګن او تګزاس دي چې د امریکا د اقتصاد یو پر دریمه برخه جوړوي.
پنځلسو نورو ایالتونو هم د کروناویروس د پراختیا له امله د بیرته پرانیستلو پلانونه ځنډولي او له دې سره به احتمالا نور ډیر کسان هم وزګار شي.
د امریکا د کار وزارت د پنجشنبې ورځې د راپور له مخې، تیره اوونۍ یو اعشاریه څلورو میلیونو کسانو د وزګارۍ د امتیازاتو درخواستونه کړي دي، خو له دې ټولو سره سره ، د هغو کسانو شمیر چې د وزګارۍ امتیازات اخلي ۷۰۰ زره کم شوی او په مجموع کې اتلس میلیونه کسان وزګار شوي دي.
له دې څخه معلومیږي چې یو شمیر کمپنۍ د نورو کمپینو له خوا د کارکوونکو د رخصتولو سره سره ، د افرادو ګمارلو ته دوام ورکوي.
د ویروس د شدت زیاتوالی او د حکومت جدي محدودیتونه د امریکا په ډیرو برخو کې د اقتصادي فعالیتونو د کموالي لامل شوي دي او ممکن په وظایفو تاثیر وکړي.
خو د جون میاشتې د وظایفو په اړه د امریکا د حکومت راپور د ۴.۸ میلیونو وظایفو د رامنځ ته کیدو او همدارنګه له ۱۳.۳ سلنه څخه ۱۱.۱ سلنې ته د وزګارۍ د کچې د ښکته کیدو خبر ورکوي.
د امریکا د حکومت چارواکو د نورو کمکي بستو له ورکولو ملاتړ کړی دی، خو د سنا جمهوري غوښتونکو په اوونۍ کې د ۶۰۰ امریکايي ډالرو د ورکولو له غځیدو سره مخالفت کړی دی او ویلي دي چې په دې سره یو شمیر کسان چې وزګار شوي، بیرته کار ته د ستنیدو لپاره زړونه نه ښه کوي.
د استازو د مجلس دیموکراتانو تر جمهوري میاشتې پورې د ۶۰۰ امریکايي ډالرو د ورکولو ملاتړ کړي دي.
