د کابل ښار د چهاردهي په بختیار کلا سیمه کې د 'مور کمپ' په نوم د روږدو د درملنې داسې یو مرکز فعالیت لري، چې پکې د اوبو په واسطه د معتادینو درملنه کیږي.
پدې کمپ کې دمګړۍ تر ۲۰ معتادین تر درملنې لاندې دي، خو دا کمپ په یو وخت کې د ۵۰ روږدو د درملنې ظرفیت لري.
د مور د کمپ مسوول نسیم علي زاده وايي، چې دلته معتادینو ته درمل نه ورکول کیږي او یوازې د اوبو او ښوونې په واسطه یې درملنه کیږي.
ښاغلي علي زاده امریکا غږ ته وویل "مور کمپ په تیرو ۹ کلونو کې د شاوخوا ۹۴۰۰ معتادینو درملنه کړې او له دې شمیرې ۹۵۰ تنه یې له مخدراتو لاس اخیستی او بیرته خپل عادي ژوند ته ګرځیدلي دي."
د دې کمپ مسولین وايي چې د هر ناروغ درملنه تر ۴۰ورځو پورې وړیاکیږي.
په ورته وخت کې د افغانستان د عامې روغتیا وزارت په طبي لحاظ د اوبو له لارې د معتادینو درملنه معیاري نه ګڼي.
