د افغانستان د کرکټ ځوان لوبغاړي مجیب ځدراڼ په نړۍ کې لومړنی لوبغاړی شو چې په کم عمر کې پنځه لوبغاړي په نړیوالې یو ورځنۍ لوبې کې سوځوي.
د پاکستان د کرکټ پخواني لوبغاړي وقار یونس دغه ریکارډ په ۱۹۹۰ میلادي کال کې پداسې حال کې جوړ کړې و چې هغه اتلس کلن و. خو مجیب ځدران بیا یوازې شپاړلس کاله عمر لري.
مجیب ځدران په ننۍ لوبې کې پوره لس اورونه وکړل، پنځوس منډې یې ورکړلې او د زمبابوې پنځه لوبغاړي یې وسوځول. ځدران د ننۍ لوبې د غوره لوبغاړي جایزه هم واخیستله.
مجیب ځدراڼ او وقار یونس دواړو دغه ریکارډونه د عربي متحده اماراتو د شارجې په نړیوال لوبغالي کې جوړ کړي.
مجیب ځدران د افغانستان د نولس کلنې لوبډلې لوبغاړی دی او تل د لوبې په پیل کې توپ اچونه کوي چې د کرکټ د نویو اصولو پر اساس د توپ اچولو یو تر ټولو سخت حالت وي.
ښاغلی ځدران همدارنګه دریم افغان لوبغاړی دی چې د هند په تجارتي سیالیو (آی پي ایل) لوبه کوي. هغه د کنګز ایلیون پنجاب لوبډلې په څلور سوه لکه هندي کلدارو اخیستی.
د دې لوبې په ګټلو سره افغانستان د زمبابوې نه د روانو سیالیو لړۍ هم وګټله. دا دریم ځل دی چې افغانستان د زمبابوې نه د یو ورځنیو لوبو لړۍ یا سیریز ګټي.
