په افغانستان کې د اعتیاد مخ په پراخېدو ستونزه حیواناتو ته هم غځېدلې ده. په کابل ښار کې یوه سپۍ چې د مخدره موادو له معتادینو سره یوځای ژوند کوي په هیروینو روږدې شوې ده او هره ورځ کله چې معتادین هیروئین استعمالوي، معتاده سپۍ هم د مخدره موادو د څکلو لپاره د هغوی څنګ ته ورځي.
دا سپۍ د کابل ښار په کوټه سنګي سیمه کې د سرک په غاړه د مخدره موادو له معتادینو سره یو ځای ژوند کوی.
په دې سیمه کې ګڼ شمیر بېسرپناه معتادین لیدل کیږي. حاجي جاوید یو له دغو معتادینو څخه دی، چې د دغې سپۍ پالنه کوي او ورته مخدره مواد ورکوي.
دی وايي، چې په پیل کې یې نور معتادین دغې سپۍ ته د هیروئینو له ورکولو څخه منع کول، خو کله چې پوه شو سپۍ په مخدره موادو روږدې شوې ده ورته یې د هیروئینو ورکول پیل کړل.
حاجي جاوید له ۲۵ کلونو راهیسې هیروئین څکوي. دی چې په یوه پښه سخت ټپي هم دی، د خلکو له ناوړه چلند شکایت کوي.
دی وايي سره له دې چې ټپي دی او په سختو شرایطو کې ژوند تیروي، خو له دغو کړاونو سره سره بیا هم د دغې سپۍ پالنې ته دوام ورکوي او د خوړو ترڅنګ ورته هره ورځ هیروئین هم برابروي.