ناټو او اروپايي ټولنې په افغانستان کې د وسله والو طالبانو د بریدونو او تاوتریخوالي کمېدو غوښتنه کړې ده.
د ناټو عمومي منشي ینس سټولټنبرګ د سې شنبې په ورځ اپرېل۱۴ (وري ۲۶) د ناټو غړو هیوادونو د دفاع وزیرانو په غونډه کې د وینا پر مهال له طالبانو څخه غوښتي چې خپل بریدونه ودروي او د دوحې د سولې هوکړه لیک په بشپړه توګه عملي کړي.
ښاغلي ستولټنبرګ زیاته کړې د امریکا او طالبانو د سولې د هوکړه لیک په اساس په افغانستان کې سولې ته د رسېدلو یوازنۍ لار د طالبانو لخوا د تاوتریخوالي کمېدل دي.
هغه ګواښ کړی چې طالبان به د جګړې له لارې په افغانستان کې بریالي نشي.
نوموړي زیاته کړې: "ناټو له افغانستان سره خپلو ژمنو ته دوام ورکوي... موږ په دې باور یو چې د سولې له بهیر سره د مرستې کولو مناسبه لار له افغانانو څخه ملاتړ کول دی، تر څو طالبان پوهه شي چې هیڅ کله د جګړې له لارې نشي بریالي کیدای."
پر همدې مهال د افغانستان لپاره د اروپايي ټولنې ځانګړي استازي د افغان حکومت او طالبانو لخوا د زندانیانو د ازادولو هر کلی کړی او زیاته کړې ده چې د زندانیانو په ازادولو سره دي هم مهاله تاوتریخوالی کم شي.
رولاند کوبیا همدارنګه زیاته کړې چې د ټولو زندانیانو د ازادولو مخکې دي د افغان حکومت او طالبانو ترمنځ بین الافغاني خبرې هم پیل شي.
خو افغان حکومت بیا ویلي چې طالبانو د تاوتریخوالي کمولو په اړه پر خپلو ژمنو عمل نه دی کړی او د دغه ډلې لخوا تاوتریخوالی زیات شوی دی.
تېره ورځ د افغانستان د ملي امنیت شورا ویاند جاوید فیصل وویل چې د حکومت لخوا د سولې په اړه هڅې تر بل هر وخت زیاتې شوي، خو طالبانو بر عکس تاوتریخوالی زیات کړی دی.
د افغانستان د بشري حقونو کمېسیون هم وړمه ورځ وویل چې د امریکا او طالبانو ترمنځ د سولې له هوکړه لیک څخه وروسته ۲۰۲ تنو افغانانو ته مرګ ژوبله اوښتې ده.
دغه کمېسیون ویلي و چې د یادې مرګ ژوبلې ۵۰ سلنه مسؤلیت وسله والو طالبانو او پاتې داعش او نورو افرادو ته متوجه دی.
افغان حکومت تر دا مهاله ۳۶۱ طالب بندیان د سولې بهیر سره د مرستې په توګه له بګرام زندان څخه ازاد کړي دي.
