په داسې حال کې چې د متحده ایالاتو جمهور رئیس ډونالډ ټرمپ پلان لري د همدې راتلونکې سه شنبې په ورځ د کاناډا او مکسیکو په وارداتو تازه ګمرکي تعرفې ولګوي خو د امریکا د سوداګرۍ وزیر وایي چې دا نوې تعرفې به ۲۵ په سلو کې نه وي.
هاورډ لټنیک یکشنبه مارچ دویمه ( کب ۱۲) د فاکس نیوز امریکایي تلویزیون سره په مرکې کې وویل چې وضعیت د بدلیدو په حال کې دی او زیاته یې کړه چې د ګمرکي تعرفو په هکله پریکړه د جمهور رئیس ټرمپ په لاس کې ده او تر څنګ یې دا هم وویل چې ښایي تازه ګمرکي تعرفې ۲۵ په سلو کې نه وي لکه ټرمپ یې چې پلان درلود.
لټنیک وویل، " په کاناډا او مکسیکو به سه شنبه ګمرکي تعرفي ولګول شي. دقیقاً لکه هماغسې چې دي خو مونږ په دې هکله پریکړه جمهور رئیس او د هغه ټیم ته پریږدو چې مذاکرات پرې وکړي."
جمهور رئیس ټرمپ تیره اونۍ ویلي وو چې د مکسیکو څخه په ټولو اموالو او له کاناډا څخه په غیر ضروري وارداتو به ۲۵ په سلو کې ګمرکي تعرفې په بشپړه توګه وضع کړي ځکه استدلال یې کاوه چې دې دواړو ګاونډیو هیوادونو متحده ایالاتو ته د ناقانونه مخدره موادو راتګ مخنیوي لپاره په کافي اندازه اقدامات نه دي کړي.
هاورډ لټنیک په دې مرکې کې همدارنګه وویل چې کاناډا او مکسیکو د متحده ایالاتو سره د خپلو سرحدونو د خوندیتوب لپاره "مناسب اقدامات" کړي دي خو تر څنګ یې دا هم وویل چې له دې هیوادونو څخه لا هم د فنټنایل په نامه وژونکي مخدره مواد را روان دي.
جمهور رئیس ټرمپ تیره میاشت د دواړو هیوادونو په وارداتي اموالو باندې ۲۵ په سلو کې ګمرکي تعرفي ولګولې خو بیا یې د کاناډا او مکسیکو د مشرانو سره تر خبرو وروسته یې د یوې میاشتې لپاره وځنډولې. دغو دواړو مشرانو ژمنې وکړې چې د سرحدونو خوندیتوب لپاره به اضافي سرتیري استوي چې امریکا ته نه یوازې د مخدره موادو بلکې ناقانونه کډوالو د تګ مخه هم ونیول شي.
د متحده ایالاتو جمهور رئیس همدارنګه ویلي چې د سه شنبې په ورځ به د چین په اموالو هم لس په سلو کې اضافي ګمرکې تعرفې ولګوي. دا ګمرکې تعرفې د هغو لسو فیصدو ګمرکي تعرفو برسیره له چین څخه په وارداتو لګول کیږي چې د تیرې فبروري میاشتې په څلورمې نیټې په چین لګول شوي و.
ټرمپ د کاناډا او مکسیکو په شان په چین هم تور ولګوه چې متحده ایالاتو ته د فنټنایل په نامه مخدره مواد راځي.
فورم \ دبحث خونه