پاکستان د نیوزلینډ نه غوښتي و چې د شلو شلو اورونو د لوبو لپاره دې هیواد ته ولاړ شي خو د نیوزلینډ لوبډلې د امنیتي دلایلو په خاطر د پاکستان غوښتنه رد کړیده.
د نیوزلینډ لوبډله د روان کال په آخرو میاشتو کې د پاکستان د لوبډلې سره د ټیسټ، یو ورځنیو او شلو اورونو د لوبو لپاره عربي متحده اماراتو ته ځي. د نیوزلینډ د کرکټ رئیس ګریک بارکلي د کریک انفو ویب پاڼې ته ویلي دي چې د حکومت ، لوبغاړو او امنیتي څانګو سره تر سلا مشورې وروسته یې پاکستان ته د نه تللو پریکړه کړې.
د 2009 کال راپدیخوا چې په پاکستان کې د سریلانکا په لوبډلې تروریستي برید وشو، نړیوالې لوبډلې دې هیواد ته د تلو نه انکار کوي او پاکستان خپلې اکثره کورنۍ لوبې په عربي متحده اماراتو کې کوي.
د زمبابوې لوبډلې په 2015 کال کې پاکستان ته د شلو شلو اورنو د لوبو لپاره تللې وه چې د همدې لوبو پر وخت هم د قذافي د نړیوال لوبغالي سره نږدې چاودنه وشوه.
د ویسټ انډیز لوبډلې هم چې مشهور لوبغاړي یې پکې ن و شامل، د روان ۲۰۱۸ کال د اپریل په میاشت کې پاکستان د دریو شل اوریزو لوبو لپاره تللې وه. د پاکستان کرکټ بورډ زیار باسي نړیوالو لوبډلو ته د امنیت ډاډ ورکړي او پاکستان ته د ورتګ قناعت ورکړي خو نړیوالې لوبډلې لا هم پاکستان ته د امنیتي دلایلو په خاطر زړه نه ښه کوي.
