ایراني مقاماتو د هیواد په جنوب لویدیځ کې د سختو بارانونو له کبله له ښارونو او کلیو څخه د خلکو د ایستلو فرمان صادر کړی دی.
د ایران دولتي اژانس رپوټ ورکړی دی چې تر اوسه د خوزستان ولایت په جنوب لویدیځ کې د پنځو حوزو اوسیدونکي امنو ځایونو ته انتقال شوي دي.
د ایران د کورینو چارو وزیر ویلي دي چې شاوخوا ۴٠٠ زره کسان پدغو سیمو کې د سیلابونو له گواښ سره مخامخ دي.
تر اوسه د ایران د طبیعي پیښو په وجه د ٧٠ تنو مړینه تائید شوې ده.
د خوزستان ولایت په گاونډ کې د لرستان ولایت اوه کلي هم د ځمکې د خویدو له گواښ سره مخامخ دي.
په ایران کې د مارچ د ١٩ بارانونو او سیلابونو د پیل راهیسې پدې هیواد کې شاوخوا ۱۹۰۰ ښارونه او کلي تاواني شوي دي.
د ایران حکومت اعلان کړی دی چې د هیواد په جنوبي ښارونو کې گرځنده طبي ټیمونه ځای پر ځای شوي دي. د دولتي منابعو په وینا پدې وروستیو ورځو کې شاوخوا ١٠٠٠ کسان په هلي کوپترو کې امنو ځایونو ته انتقال شوي دي.
پدې لړ کې د امریکا د بهرنیو چارو وزیر مایک پمپیو په یوه وینا کې د امریکا د ولس په استازیتوب د ایران وروستیو سیلاب ځپلو سره خواخوږي څرگنده کړې ده.
هغه همداشان ویلي، امریکا د نړیوالو مرسته رسونکو سازمانونو سره او هم په مستقیمه توگه د ایران له خلکو سره مرستې کولو ته تیاره ده.
