د سعودي عربستان د بهرنیو چارو وزارت وویل، د سعودي عربستان یو دپلوماتیک پلاوی د شنبې په ورځ اپریل اتمه ۰وري ۱۹) تهران ته ورسید چې وروسته له اووه کالو بیا د خپل دپلوماټیک ماموریت په پرانستلو خبرې وکړي.
د سعودي عربستان دپلوماتان وروسته له هغې تهران ته ځي چې په روانه اونۍ کې په چین کې د دواړو هیوادونو د بهرنیو چارو وزیرانو بې سارې کتنه وکړه او دوی تیره میاشت د دپلوماتیکو اړیکو په بیا رغولو موافقه وکړه.
د سعودي رسمي خبري اژانس ددې هیواد د بهرنیو چارو وزارت په حواله ویلي چې د شنبې د ورځې دغه سفر د چین په منځګړیتوب د مارچ په لسمه د دواړو سیمه ییزو قدرتونو ترمنځ د "درې اړخیزې موافقې د پلي کولو" یوه برخه ده، چې په ۲۰۱۶ کال کې خړې پړې شوې اړیکې بېرته ورغوي.
د منځني ختیځ دغو دوو اوږدمهاله سیالانو اوس ژمنه کړې چې په ګډه کار وکړي.
د سعودي د بهرنیو چارو وزیر شهزاده فیصل بن فرحان او د هغه ایراني سیال حسین امیر عبداللهیان د پنجشنبې په ورځ په بیجینګ کې سره وکتل او ژمنه یې وکړه چې د خلیج په کړکیچنه سیمه کې به "امنیت او ثبات" راولي.
د سعودي عربستان خبري اژنس زیاته کړې چې د شنبې په ورځ د سعودي یو "تخنیکي پلاوي" په تهران کې د ایران د بهرنیو چارو په وزارت کې د پروتوکول له مشر سره وکتل.
د دواړو هېوادونو اړیکي وروسته له هغه خړې پرې شوې چې د ایران په اسلامي جمهوریت کې مظاهره چیانو په سعودي عربستان کې د یو مشهور شیعه عالم له اعدام وروسته ددې هیواد پر دپلوماتیکو ماموریتونو برید وکړ.
د اړیکو د رغیدو په ترڅ کې د ایران ولسمشر ابراهیم رئیسي ته د سعودي پاچا سلمان بلنه ورکړې ده، چې د روژې له مبارکې میاشتې وروسته ریاض ته سفر وکړي.
