افغان چارواکي وايي، په کندهار ولایت کې د وسله والو طالبانو یو اساسي مرکز له منځه وړی دی.
د غه چارواکي وايي، له هلمند او اروزګان ولایت سره په سرحد کې د میوند ولسوالۍ په بند تېمور سیمه کې د ګډو افغان ځواکونو په پیل شویو پوځي عملیاتو کې ۶۱ وسله وال طالبان هم وژل شوي دي.
د ۲۰۵ اتل قول اردو د څلورمې لوا قوماندان جنرال امیر محمد وايي، دغه ګډ پوځي عملیات چې تېر ماسختن پای ته رسېدلي د کشفي بې پیلوټه الوتکو له دید څخه د پټېدو لپاره د وسله والو طالبانو د جنګي قوماندانانو د پتېدو مرکزونه هم لهمنځه تللي.
نوموړي زیاته کړه چې په دغو عملیاتو کې د وسله والو طالبانو د ماین جوړولو یو لوی مرکز هم لهمنځه وړل شوی دی.
ښاغلي امیر محمد د جمعې په ورځ د«لېندۍ پر ۳۰مه» امریکا غږ ته وویل:"د ۳۵۰ متره په ژور والي یې غښتلي خندقونه کیندلي و چې له بمبارۍ او یا هم د افغان قواو له عملیاتو څخه د ځان ساتلو لپاره یې ور څخه کار اخیست، ان که جنګي الوتکو هلته بمبارد هم کاوه، دوی د ځمکې په لاندې برخه کې برخه کې ځان ترې ساته او د ماینونو د جوړولو خاص بهرني تخنیکي کسان یې پکښي اوسېدل، چې د کندهار، هلمند اروزګان او ان د غزني ولایتونو لپاره یې خطرناکه ماینونه جوړول، او زخیره کول، دا قوي مرکز یې موږ له منځه وړی."
د میوند ولسوالۍ بند تېمور سیمه له کلونو راهیسې په جنوبي ولایتونو کې د وسله والو طالبانو د جګړې د قوماندې عمده مرکز بلل کېږي چې د چارواکو په وینا د پیل شوو پوځي عملیاتو لپاره عمده هدف و.
د پوځ مقامات وايي، چې د بند تېمور په سیمه کې یې ګڼ کلي د وسله والو طالبانو له حضور څخه پاک کړي او ۱۴۸ ښخ شوي ماینونه یې هم لهمنځه وړي دي.
امنیتي چارواکي زیاتوي چې په روانو ګډو پوځي عملیاتو کې د قاطع ملاتړ ماموریت الوتکې هم د دوی ملاتړ کاوه.
د میوند ولسوالۍ یوه امنیتي چارواکي اشنا راډیو ته وویل چې د بند تېمور په ګډو پوځي عملیاتو کې ۶ تنه د پولیسو او پوځ سرتېري هم وژل شوي او پنځه تنه نور یې هم ټپیان شوي دي.
سرچینه وايي، چې په دغه عملیاتو کې د وسله والو طالبانو یوه دهشکه چې الوتکې یې په نښه کولې هم له منځه وړل شوې.
خپله وسله والو طالبانو د بند تېمور د پوځي عملیاتو په اړه کومه تبصره نه ده کړې.
