د جنوبي کوریا د پیوستون او یووالي د څانګې وزیر کیم یون چول د جمعې په ورځ جون ۱۹(غبرګولي۳۰) له خپلې دندې استعفا وکړه.
د جنوبي کوریا ولسمشر مون جای اون هم وار له واره د خپل دغه وزیر استعفا ومنله.
د جنوبي کوریا د پیوستون وزیر له هغه وروسته استعفا وکړه چې د سه شنبې په ورځ شمالي کوریا په خپل سرحد کې د دغه وزارت څانګه او ودانۍ په بمونو والوځوله.
د شمالي کوریا په ضد د جنوبي کوریا تبلیغاتي پاڼو او د سرحد په اوږدو کې د جنوبي کوریا مرستو شمالي کوریا پارولې وه او بلاخره یې دا ودانۍ والوځوله.
وزیر کیم یون چول د چهارشنبې په ورځ اعلان وکړ چې له خپلې دندې استعفا کوي او د دواړو هېوادونو ترمنځ د تازه شخړو مسولیت یې هم ومانه.
دغه وزیر د ۲۰۱۹ د اپریل له میاشتې راهېسې دنده پیل کړې وه او د دواړو هېوادونو ترمنځ یې د پیوستون هلې ځلې کولې.
د جنوبي کوریا جمهوري ریاست د هغه د استعفا په اړه نور جزیات نه دي ورکړي.
د شمالي کوریا او جنوبي کوریا اړیکي له هغه وروسته نور هم خراب شول چې څو میاشتې مخکې په ویتنام کې د امریکا د ولسمشر دونالډ ټرمپ او د شمالي کوریا د مشر کیم جونګ اون ترمنځ غونډې نتیجه ورنکړه.
