سريلانکا د پنجشنبې په ورځ، فبروري ۲۷ (کب نهمه) په دغه هېواد کې د انسانانو او وحشي فیلانو د نښتو د مخنیوي لپاره بیړني اقدامات په داسې حال کې اعلان کړل چې په دغو نښتو کې د یوې لسیزې راهیسې تقریبا ۱۲۰۰ کسان او ۳۵۰۰ فیلان وژل شوي دي.
د سریلانکا د چاپیریال ساتنې وزیر ډمیکا پتابینډي پارلمان ته وویل چې د ځنګلي سیمو چاپیر برقي پنجرې لګوي ترڅو په کلیوالي سیمو باندې د فیلانو د بریدونو مخنیوی وشي.
پتابینډي وویل: "موږ د انسانانو او فیلانو ترمنځ د بحران د مخنیوي لپاره نورې پیسې ځانګړې کوو، او هیله لرو چې په لنډ وخت کې دغه مشکل حل کړو."
پتابینډي وویل چې د ۲۰۱۵ او ۲۰۲۴ کلونو ترمنځ ۱۱۹۵ انسانان او ۳۴۸۴ فیلان وژل شوي دي.
د جنوري په میاشت کې درې نور انسانان او ۴۳ فیلان ووژل شول.
په پارلمان کې د حکومت مخالفې سیاسي ډلې غړي نالین بنډارا وویل، دا شمېر "هیښوونکی" دی او له حکومتي مقاماتو څخه یې غوښتنه وکړه چې د انسانانو د ژغورنې لپاره داسې لارې چارې ولټوي چې فیلانو ته زیان ونه رسیږي.
هغه وویل چې د مړو شویو فیلانو د پاتې شونو په ښخولو باندې حکومت په تیره یوه لسیزه کې نږدې ۱۲ میلیون ډالر لګولي او په همدې موده کې یې د فیلانو د بریدونو قربانیانو ته څلور میلیون ډالر تاوان ورکړی دی.
په سریلانکا کې د فیلانو شمېر د ۷۰۰۰ په شاوخوا کې اټکل شوی دی. فیلان چې په بودايي عقیده کې مقدس دي، د سریلانکا ملي شتمني او ورته زیان رسول جرم ګڼل کیږي.
خو په کلیوالي سیمو او کرهنیزو فصلونو باندې د فیلانو د بریدونو له کبله، ددغو ځناورو قتل عام دوام لري.
ډیر فیلان په برق نیول شوي، زهر ورکړل شوي او یا هم ویشتل شوي دي. کله ناکله فیلانو ته په ورکړل شويو خوړو کې چاودېدونکي توکي ایښودل شوي او له کبله یې فیلان ژوبل شوي او مړه شوي دي.
په سریلانکا کې د ریل پټلۍ له ډیرو ځنګلي سیمو څخه تیریږي او ډیر فیلان د ریل ګاډو سره د ټکر له کبله هم وژل شوي دي.
د سريلانکا په ختیځ کې اووه فیلان تېره اونۍ د یو ریل ګاډي سره له ټکر وروسته مړه شول. دا په دغه هېواد کې د فیلانو د مرګ ژوبلې ترټولو خونړۍ پیښه وه.
د طبیعت د ساتنې نړیوالې اتحادیې اسیايي فیلان د هغو ژویو په لیست کې شامل کړي چې نسل یې د ورکېدو له خطر سره مخامخ دی.
د اسیايي فیلانو شمېر د ۲۶۰۰۰ په شاوخوا کې اټکل شوی چې زیاتره یې د هند په ځنګلونو کې دي او د ۶۰ څخه تر ۷۰ کلونو ژوند کوي.
فورم \ دبحث خونه