د سوریې د نوي حکومت چارواکو دوشنبه مارچ ۱۰ ( کب ۲۰) وروسته تر هغه د مخکني جمهور رئیس بشارالاسد پلویانو په خلاف د نظامي عملیاتو پای ته رسولو اعلان وکړ چې د بشري حقونو څار ادارې وویل څه باندې ۱۰۰۰ ملکیان پکې ووژل شول.
دا د اسد رژیم تر ړنګیدو وروسته پدې هیواد کې چې جګړو ځپلی، د تشدد تر ټولو ناوړه پیښه بلل کیږي.
د سوریې د نوي حکومت دفاع وزارت ویاند حسن عبدالغني په یوې اعلامیې کې ویلي چې د لاذقیې او طرطوس په ولایتونو کې د امنیتي ګواښونو او مخکني رژیم "پاتې شونو" په خلاف تصفیوي عملیات پای ته رسیدلي دي.
تر دې وړاندې د سوریې موقتي جمهور رئیس احمد الشرع ویلي و چې نه پریږدي هیواد یې بیا ملکي ګډوډۍ خوا ته ولاړ شي.
ښاغلي الشرع پرته لدې چې د کوم هیواد یا ډلې نوم واخلي وویل، "سوریه به کوم بهرني قوت یا داخلي کړیو ته اجازه ورنکړي چې دا هیواد کورنۍ جګړې یا ګډوډۍ په لور ورټیل وهي".
د سوریې مشر همدرانګه ویلي چې ددې هیواد د لاذقیې په ولایت کې د علوي فرقې ملکیانو ډله ایزې وژنې په هکله پلټنې کوي او د مسؤلو کسانو سره به حساب کتاب کوي.
ښاغلي الشرع په یو ویډیویي پیغام کې چې د سانا دولتي خبري اژانس خپور کړی ویل، چې یوه خپلواکه کمیټه جوړه شوې چې د دې پیښې په هکله پلټنې وکړي او مسؤل کسان پیدا کړي تر څو محکمې ته وړاندې شي.
د سوریې جمهور رئیس ویلي، " مونږ به د ترحم پرته هر هغه کس چې د ملکیانو وینې تویدنې کې لاس لري یا یې د دولتي قدرت څخه ناوړه ګټه اخیستې وي، په ټینګه مسؤل وبولو".
د ښاغلي الشرع د څرګندونو څخه وړاندې د امریکا د بهرنیو چارو وزیر مارکو روبیو په سوریه کې د "سخت دریځو اسلامي ترهګرو" لخوا د اقلیتونو ټولوژنه وغندله او د دې هېواد له نوي حکومت یې وغوښتل چې د دې پېښو له عاملینو سره حساب وکړي.
د سوریې د بشري حقونو څاره اداره چې مرکز یې په بریتانیې کې دی خو پدې هیواد کې د کورنۍ جګړې په هکله د معلوماتو راټولولو لپاره پراخې شبکې لري، ویلي چې د تیرې پنجشنبې ورځې راهیسې د امنیتي ځواکونو او متحدینو لخوا یې ۱۰۶۸ ملکیان وژل شوي چې اکثریت یې د علوي فرقې غړي دي.
د سوریې مخکنی جمهور رئیس بشارالاسد هم د همدې فرقې غړی دی.
د لاذقیې په ولایت کې یو شمیر کسانو د فرانس پریس خبري اژانس ته ویلي چې د دوشنبې په ورځ هلته وضعیت یو څه آرام و او خلکو بالاخره وکړی شو چې له خپلو کورونو د باندې ووځي.
یو شمیر نورو بیا ویلي چې د ماښام له شپږو بجو وروسته په لارو کوڅو کې څوک نه لیدل کیږي چې ځکه چې لا هم وضعیت ډیر جدي دی.
اسلامپالو یاغیانو د ۲۰۲۴ کال په ډسمبر میاشت کې د بشارالاسد کورنۍ رژیم ړنګ کړ، چې له پنځو لسیزو راهیسې یې په سوریه کې واک درلود. بشارالاسد د علوي مذهبي اقلیت سره تړاو درلود چې د سیکولر دیکتاتور حکومت مشري کوله.
له هغه وروسته د التحریر الشام مشر احمد الشرع د جنورۍ په میاشت کې د سوریې د موقتې ادارې د مشر په توګه وټاکل شو.
د بشري حقونو لپاره د ملګرو ملتونو د ادارې مشر ولکر ترک هم په سمدستي توګه ددې وژنو بندیدل غوښتې او ملګرو ملتونو، عرب لیګ سازمان، متحده ایالاتو، بریتانیې او یو شمیر نورو هیوادونو بیا په سختو ټکو غندلي دي.
د سوریې د اوسني حکومت امنیتي ځواکونو او د پخواني حکومت طرفدارو ځواکونو تر منځ شخړه د همدې تیرې پنجشنبې په ورځ پیل شوه خو وروسته په ډله ایزې وژنې واوښته.
فورم \ دبحث خونه