د سوریې موقتي جمهورر ئیس احمد الشرع یکشنبه مارچ نهمه ( کب ۱۹) ویلي چې ددې هیواد د لاذقیې په ولایت کې د علوي فرقې ملکیانو ډله ایزې وژنې په هکله پلټنې کوي او د مسؤلو کسانو سره به حساب کتاب کوي.
ښاغلي الشرع په یو ویډیویي پیغام کې چې د سانا دولتي خبري اژانس خپور کړی ویل، چې یوه خپلواکه کمیټه جوړه شوې چې د دې پیښې په هکله پلټنې وکړي او مسؤل کسان پیدا کړي تر څو محکمې ته وړاندې شي.
د سوریې جمهور رئیس ویلي، " مونږ به د ترحم پرته هر هغه کس چې د ملکیانو وینې تویدنې کې لاس لري یا یې د دولتي قدرت څخه ناوړه ګټه اخیستې وي، په ټینګه مسؤل وبولو".
د ښاغلي الشرع د څرګندونو څخه وړاندې د امریکا د بهرنیو چارو وزیر مارکو روبیو په سوریه کې د "سخت دریځو اسلامي ترهګرو" لخوا د اقلیتونو ټولوژنه وغندله او د دې هېواد له نوي حکومت یې وغوښتل چې د دې پېښو له عاملینو سره حساب وکړي.
روبیو په یو بیان کې وویل: "متحده ایالتونه د بهرنیو جهادیانو په ګډون سخت دریځه اسلامي ترهګر غندي چې په وروستیو ورځو کې یې د سوریې په لویدیځ کې خلک وژلي دي."
هغه زیاته کړه: "متحده ایالتونه د عیسوي، دروزي، علوي او کرد ټولنو په ګډون د سوریې د مذهبي او قومي اقلیتونو سره ولاړه ده او د قربانیانو او د هغوی له کورنیو سره خپله خواخوږي شریک کوي."
د سوریې د بشري حقونو څار اداره چې مرکز یې په بریتانیه کې دی خو پدې هیواد کې د کورنۍ جګړې په هکله د معلوماتو راټولو لپاره پراخې شبکې لري، ویلي چې د لاذقیه او طرطوس په بندري ولایتونو کې امنیتي ځواکونو او د حکومت پلوو ځواکونو لخوا د علوي فرقې تقریباً ۹۷۳ملکیان وژل شویدي.
د سوریې پخوانی جمهور رئیس بشارالاسد د همدې فرقې غړی و.
د بشري حقونو لپاره د ملګرو ملتونو د ادارې مشر ولکر ترک هم په سمدستي توګه ددې وژنو بندیدل غوښتې او ملګرو ملتونو، عرب لیګ سازمان، متحده ایالاتو، بریتانیې او یو شمیر نورو هیوادونو بیا په سختو ټکو غندلي دي.
د سوریې د اوسني حکومت امنیتي ځواکونو او د پخواني حکومت طرفدارو ځواکونو تر منځ شخړه د همدې تیرې پنجشنبې په ورځ پیل شوه خو وروسته په ډله ایزې وژنې واوښته.
د سوریې جمهور رئیس په ټولو خلکو د ملي یووالي غوښتنه کړې.
هغه د دمقش یو جومات کي د خبرو پر مهال وویل، " که د خدای ج خوښه وي، مونږ به په ګډه پدې هیواد کې ژوند وکړو".
اسلامپالو یاغیانو د ۲۰۲۴ کال په ډسمبر میاشت کې د بشارالاسد کورنۍ رژیم ړنګ کړ، چې له پنځو لسیزو راهیسې یې په سوریه کې واک درلود. بشارالاسد د علوي مذهبي اقلیت سره تړاو درلود چې د سیکولر دیکتاتور حکومت مشري کوله.
له هغه وروسته د التحریر الشام مشر احمد الشرع د جنورۍ په میاشت کې د سوریې د موقتې ادارې د مشر په توګه وټاکل شو.
د سوریې د بشري حقونو څار ادارې د ارقامو له مخې په تازه نښتو کې ټول ټال ۱۳۱۱ تنه وژل شوي چې ۲۳۱ یې د حکومت امنیتي ځواکونه، ۲۵۰ د اسد طرفداري وسله وال او پاتې یې ملکیان دي.
د سوریې د کورنیو چارو وزارت ویلي چې امنیتي ځواکونو د یکشنبې په ورځ د طرطوس په ښار کې تصفیوي عملیات پیل کړي تر څو د پخواني رژیم "پاتې شوي" لدې سیمې پاک کاندي.
د فرانس پریس یو خبریال چې د لاذقیې په ولایت کې دی، ویلي چې ګڼ شمیر امنیتي ځواکونه دې سیمې ته ورغلي او د کورونو تالاشۍ یې پیل کړي.
د سیمې یو شمیر اوسیدونکو بیا ویلي چې د سوریې امنیتي ځواکونه د خلکو په کورنو کې په سړیو پسې ګرځیدل او دا یې هم ویلي چې په امنیتی پرسونل کې د نورو هیوادونو اتباع هم و خو پدې هکله لا په خپلواکه توګه شواهد ندي پیدا شوي.
فورم \ دبحث خونه