د سوریې د بشري حقونو د څار ډلې د جمعې په ورځ مارچ اوومه (کب ۱۷) وویل چې د سوریې د پخواني ولسمشر بشارالاسد د وفادارو وسله والو تر منځ له نښتې یوه ورځ وروسته، د دغه هېواد د انتقالي حکومت امنیتي ځواکونو د علوي اقلیت ۱۳۴کسان "اعدام" کړل.
په بريتانيا کې میشت د سوريې د بشري حقونو د څار ډله وايي، د پنجشنبې د ورځې نښتې په تېر دسمبر کې د بشارالاسد له راپرځېدو وروسته په سوريه کې تر ټولو بد تاوتريخوالی دی.
د بشار الاسد د رژیم له نسکوریدو وروسته، د امنیت بیا رغول په هغه هیواد کې د نویو چارواکو په وړاندې یو له خورا سختو ننګونو څخه شمیرل کیږي.
د سوریې د بشري حقونو د څار ډلې د وژل شویو کسانو د خپلوانو د تائید شویو ویډیوګانو او شواهدو پر بنسټ ویلي: "امنیتي ځواکونو د لاذقیه ښار ته څېرمه په الشیر او المختاریه ښارګوټو کې د شپږ ښځو په ګډون ۹۰ علويان اعدام کړي دي."
د سوریې د بشري حقونو د څار ډلې راپور او د لسګونو کسانو د جسدونو عکسونه او ویډیوګانې ښیي چې په وینو لړلي خلک چې ملکي جامې یې اغوستي دي د یو کور په انګړ کې پراته دي او ښځې ورته ژاړي.
په یوه بله ویدیو کې، یو سړی ښکاري چې پوځي یونیفورم یې اغوستی درې کسانو ته امر کوي چې د یو بل تر شا په ځمکه پریوزي او بیا له نږدې واټن څخه پر هغوی ډزې کوي.
د فرانس پرس اژانس ویلي دي چې د دې ویډیو رښتینوالی خپلواکو سرچینو نه دی تائید کړی. تر دې مخکې د سوریې نویو چارواکو ویلي وو چې د پنجشنبې له ورځې له نښتو وروسته یې پراخ چاڼیز عملیات پیل کړي دي.
د راپورونو له مخې، د پنجشنبې د ورځې له نښتو وروسته د پرزول شوي ولسمشر د علوي مذهبي اقلیت په مرکز لاذقیه او طرطوس ولایتونو کې د شنبې تر ورځې پورې پر تګ راتګ بندیز لګول شوی دی.
اسلامپالو یاغیانو د ۲۰۲۴ کال په ډسمبر میاشت کې د بشارالاسد کورنۍ رژیم ړنګ کړ، چې له پنځو لسیزو راهیسې یې په سوریه کې واک درلود. بشارالاسد د علوي مذهبي اقلیت سره تړاو درلود چې د سیکولر دیکتاتور حکومت مشري کوله.
له هغه وروسته د التحریر الشام مشر احمد الشرع د جنورۍ په میاشت کې د سوریې د موقتې ادارې د مشر په توګه وټاکل شو.
د سوریې رسمي خبري آژانس سانا خبر ورکړی، چې امنیتي ځواکونو د مرستندویه ځواکونو له رسیدو وروسته په دوو ولایتونو کې پراخ عملیات پیل کړي دي.
رپوټ د سوریې د نوي حکومت د یو امنیتي چارواکي په حواله ویلي چې دغه عملیات "د اسد د ملېشو پاتې شوني او هغه کسان په نښه کوي چې د هغوی ملاتړ کوي." هغه له ولسي وګړو هم وغوښتل چې "په خپلو کورونو کې پاتې شي."
د دغه راپور په چمتو کولو کې د فرانس پرس خبري آژانس څخه کار اخیستل شوی دی.
فورم \ دبحث خونه