د بریتانا د دفاع وزیر بن والاز نن اګست ۱۶ (زمري۲۵) دوشنبه وویل چې د افغانستان سقوط «د نړیوالې ټولنې ناکامي» ده. هغه د بي بي سي تلویزون ته ویلي: «موږ ټول پوهېږو چې د افغانستان کار تمام نه دی. دا یوه ناحل شوې ستونزه ده او نړۍ باید مرسته وکړي.»
د جرمني صدراعظمې انکلا مرکل په افغانستان کې د طالبانو د واکمنېدو پړه تر یوې اندازې د امریکا په داخلي سیاست اچولې ده.
د فرانسې خبري اژانس د مېرمن مرکل د ګوند د سرچینو په حواله لیکلي دي چې هغه ویلي ديچې له شلو کلونو وروسته له افغانستان څخه د ناټو وتل د «امریکا د پرېکړې» په اساس شوي چې تر یوې اندازې د هغه هېواد «داخلي سیاسي عوامل» یې دلیل ګڼل کیږي.
هغې ویلي دي: «موږ تل ویلي وو که امریکا پاتې کیږي، موږ پاتې کیږو.» مېرمن مرکل ویلي دي چې دا حالت د ډېرو لپاره او په خاص ډول د ښځو لپاره سخت دي.
د افغانستان د وضعیت په اړه د ملګرو ملتونو په ځانګړي غونډه کې د دغه سازمان سرمنشي انتونیو ګوتېرش وویل: «نړیواله ټولنه باید ډاډ ترلاسه کړي چې افغانستان بیا د ترهګرو په ځالې نه بدلیږي.»
هغه وویل چې د افغانستان وضعیت په زړه کلک خلک تعقیبوي. نوموړي په ټولو باندې او په خاص ډول په طالبانو باندې غږ وکړ چې د خلکو د حفاظت لپاره لاس په کار شي او ضمانت دې ورکړي چې بشري ضرورتونه پوره شي.
د بخښنې نړیوال سازمان: افغانستان کې باید د غمیزې مخه ونیول شي
د بخښنې نړیوال سازمان وایي چې په افغانستان د زیاتې تراژیدۍ د مخنیوي لپاره باید نړیواله ټولنه قاطعانه عمل وکړي.
د بخښنې د نړیوال سازمان عمومي منشي اګنس کالمارد، وویل هغه څه چې په افغانستان کې پیښیږي یوه غمیزه ده؛ هغه غمیزه چې باید اټکل یې شوی وای او د رامنځته کېدو مخنیوی یې شوی وای.
هغې زیاته کړه: "په زرکونو افغانان د طالبانو د غچ اخیستنې له جدي ګواښ سره مخامخ دي."
میرمن کالمارد زیاته کړه چې له پوهانو او خبریالانو څخه نیولې د مدني ټولنې د فاعلینو او د ښځو د بشري حقونو تر مدافعینو پورې ټول د بې سرنوشتۍ له ګواښ سره مخامخ دي.
آغلې کالمارد وویل: "بهرني حکومتونه باید لازمو اقداماتو ته مخه کړي چې د هغوی مصوون وتل تضمین شي چې د طالبانو له لورې د هدف کیدو له ګواښ سره مخامخ دي. دغه اقدام کې د ویزې د بهیر چټکول، د کابل د هوایي ډګر څخه د وتلو لپاره ملاتړ، د نقل مکان او بیا میشت کولو برابرول او د اجباري ایستلو مخنیوی وشي."
هغې زیاته کړه چې د ملګرو ملتونو د امنیت شورا باید یوه بیړنی پریکړه لیک تصویب کړي او د طالبانو له ډلې څخه وغواړي چې د بشري حقونو نړیوال قانون ته درناوی وکړي او غچ اخیستونکي بریدونه ودروي.
