د اروپا پارلمان: افغان همکاران باید د غچ اخیستنې سره مخامخ نکړو
د اروپایي ټولنې د پارلمان رئیس د چهارشنبې په ورځ اګست ۱۸ (زمري ۲۷) ویلي چې اروپایي ټولنه د افغان پناه غوښتونکو د منلو مسولیت لري او نشي کولای هغه کسان چې دې ټولنې ته یې په افغانستان کې کار کړی "د غچ اخیستنې له ګواښ" سره مخامخ کړي.
ددې ټولنې د پارلمان رئیس ډیویډ ساسولي وویل هغه پناه غوښتونکي چې له افغانستان څخه اروپا ته راځي باید په مساوي بڼه د اروپایي اتحادیې د غړو هیوادونو ترمنځ وویشل شي.
د امریکا د بهرنیو چارو وزارت د یوې ګډې اعلامیې په خپرولو سره چې اروپایي ټولنې او ۲۱ نورو هیوادونو لاس لیک کړی په افغانستان کې د ښځو او نجونو په وضعیت او د هغوی د کار، زده کړو او د تګ راتګ د ازادۍ حق په اړه یې ژوره اندیښنه څرګنده کړې ده.
پدغه بیان کې د هغو کسانو څخه چې په افغانستان کې واکمن دي او د افغانستان په ګوټ ګوټ کې له مقاماتو غوښتل شوي چې د افغاني میرمنو او نجونو ساتنه او ژغورنه وکړي.
پدغه اعلامیه کې راغلي: "د افغانستان ښځې او نجونې د افغانستان د ټولو خلکو په څیر د مصون، امن او با حیثیته ژوند لایق دي. د هر ډول توپیر او بد چلند مخنیوی باید وشي. مونږ د بشر دوستۍ مرستو له لارې د هغوی سره د مرستې ته تیار یو چې غږ یې واوریدل شي. له نژدې څخه څارو چې [په افغانستان کې] هر راتلونکی حکومت هغه حقونه او ازادۍ چې په تیرو ۲۰ کلونو کې د افغانستان د ښځو او نجونو د ژوند نه جلا کیدونکی جز ګرځیدلي، څه ډول تضمینوي."
البانیا، ارجنتاین، آسترالیا، برازیل، کانادا، چلي، کولمبیا، کوستاریکا، اکوادور، السلوادور، هندوراس، ګواتیمالا، شمالي مقدونیه، نیوزیلند، ناروی، پاراګوای، سنګال، سویس او بریتانیا ددې اعلامیې نور لاس لیک کوونکي دي.
غني متحده عربي اماراتو ته تللی دی
د متحده عربي اماراتو حکومت د یوې اعلامیې په خپرولو سره ویلي دي چې محمد اشرف غني او کورنۍ یې په اماراتو کې اوسیږي.
پدې لنډه اعلامیه کې چې د چهارشنبې په ورځ اګست ۱۸ (زمري ۲۷) خپره شوه راغلي دي: "د متحده عربي اماراتو د بهرنیو چارو او نړیوالو همکاریو وزارت تائیدولی شي چې متحده عربي اماراتو د بشر دوستۍ له مخې د جمهور رئیس اشرف غني او د هغه د کږرنۍ هر کلی کړی دی."
کابل کې د بریتانیا سفیر؛ طالبان د تخلیې په عملیاتو کې همکاري کوي
په افغانستان کې د بریتانیا سفیر وایي چې بریتانیا "په تکتیکي او عملي کچه" ددې هیواد د اتباعو او په شرایطو برابرو افغانانو د ایستلو په برخه کې په کابل کې د طالبانو سره کار کوي.
د بریتانیا سفیر لوري بریستو، د چهارشنبې په ورځ اګست ۱۸ (زمري ۲۷) په یو ویدیویي پیغام کې خبریالانو ته وویل: "جالب ده چې طالبانو ددې عملیاتو څخه ملاتړ ته مخ کړې ده."
ښاغلي لوري وویل: "زما ارزونه داده چې دا هغوی په خپله ګټه ګڼي چې دغه بهیر [تخلیه] په منظمه او څرګنده توګه وشي. او څرګنده ده چې دا زمونږ په ګټه هم دي...پدې خاطر مونږ په هغه برخه کې چې په تکتیکي او عملي کچه ورته اړتیا لرو د هغوی سره کار کوو."
په افغانستان کې د بریتانیا سفیر وایي چې د ایستلو عملیات به په څو ورځو کې ترسره شي.
