په افغانستان کې د برښنا پرچاوي زیاتوالي سره هم مهاله، د افغانستان برښنا شرکت د اوزبیکستان برښنا ملي شرکت ترمنځ د ۲۰۲۳ میلادي کال لپاره د واریداتي برښنا د تړون د تمدید خبر ورکړ.
د افغانستان برښنا شرکت ویاند حکمت الله میوندي د یکشنبې په ورځ جنورۍ لومړۍ (مرغومې ۱۱) خبریالانو ته لېږلي غږیز پیغام کې ویلي چې دغه تړون تیره ورځ په اوزبیکستان کې د دواړو هیوادونو د استازو ترمنځ لاسلیک شوی دی.
ښاغلي میوندي زیاته کړې: "سږ کال موږ وکولای شوای چې له اوزبیکستان هیواد سره تړون نوی کړو د وارداتي برښنا په برخه کې."
نوموړي زیاته کړې چې د دغه تړون په اړه بشپړه معلومات به تاشکند ته د تللي طالب پلاوي له رارسېدو وروسته له رسنیو سره شریک شي.
طالب چارواکي داسې مهال له اوزبیکستان سره د وارداتي برښنا تړون د تمدید خبر ورکوي چې په دې وروستیو کې کابل او یو شمېر نورو ولایتونو ته د دغه هیواد وارداتي برښنا د تخنیکي ستونزو له امله قطعه شوې وه چې له امله یې خلک له ګڼو ستونزو سره لاس او ګرېوان شوي و.
د افغانستان برښنا شرکت تر دې مخکې ویلي و چې د اوزبیکستان وارداتي برښنا تخینکي ستونزې هواري په اړه هڅې پيل شوي دي.
د طالبانو حکومت د وارداتي برښنا د تخنیکي ستونزو د هواري په هدف د تیرې پنجشنبې په ورځ اوزبیکستان ته د اوبو او نرژۍ وزارت د سرپرست عبداللطیف منصور په مشرۍ د یو پلاوي د سفر خبر ورکړ.
د طالبانو د اوبو او نرژۍ وزارت سرپرست چې ددغه پلاوي مشري کوي د افغانستان له ملي تلوېزیون سره مرکه کې ویلي چې له اوزبیکستاني چارواکو سره یې د برښنا د تخنیکي ستونزو هواري او د ۲۰۲۳ میلادي کال لپاره د وارداتي برښنا د تمدید په اړه خبرې کړي دي.
ښاغلي منصور ویلي چې تاشکند ته د طالب پلاوي د سفر په ترڅ کې له اوزبیکستان سره د ۲۰۲۳ میلادي کال لپاره د برښنا وارداتي تړون د تمدید ترڅنګ افغانستان ته د وارداتي برښنا تخنیکي ستونزه هواره شوې ده.
طالبانو د ۲۰۲۱ کال د اګست له پنځلسمې څخه په افغانستان کې واک ته تر رسېدو وروسته د روان کال تر پای ته رسېدو پوري له اوزبیکستان سره د وارداتي برښنا تړون لاسلیک کړی و.
د دغه تړون په اساس، اوزبیکستان ژمنه کړې وه چې د ۲۰۲۲ کال په اوږدو کې به، د ۱۰۰ میلیون ډالرو په بدل کې به افغانستان ته دوه میلیارډ کیلواټ برښنا صادره کړي.
افغانستان پر وارداتي برېښنا متکي دى او د خپلې اړتيا د پوره کولو لپاره شاوخوا ١٦٠٠ميګاواټه برېښنا ته اړتيا لري. افغانستان د خپلې اړتيا ٧٠ سلنه برېښنا له اوزبيکستان، تاجيکستان او ايران څخه واردوي او پاتې ٣٠ سلنه له داخلي منابعو برابروي.
