د متحده ایالاتو جمهور رئیس ډونالډ ټرمپ جمعه مارچ اوومه ( کب ۱۷) وویل چې د ایران ستر روحاني مشر ایات الله علي خامنه یي څخه یې په یو لیک کې غوښتي چې د اټومي پروګرام په هکله تازه خبرو ته حاضر شي.
ښاغلي ټرمپ په سپینې ماڼۍ کې خبریالانو سره په خبرو کې دا خبرداری هم ورکړ که ایران خبرو ته حاضر نشي، ښایي د نظامي اقدام څخه به کار واخلي.
ټرمپ پرته لدې چې نور جزیات ورکړي وویل چې د ایران سره د اتومي پروګرام په هکله "په وروستۍ شیبې کې یو" خو تر څنګ یې دا خبرداری هم ورکړی چې که موافقه ونشي، ښایي له نظامي لارو چارو به کار واخلي.
جمهور رئیس ټرمپ وویل، " هیله ده چې د سولې تړون ولرو. مونږ د ایران اتومي پروګرام په باره کې په وروستیو شیبو کې یو. زه غواړم د بل ( نظامي اقدام) پر ځای د سولې تړون ووینم."
جمهور رئیس په ښکاره توګه د نظامي اقدام یادونه ونکړله خو د اشارې په توګه یې وویل چې " هغه بل ( نظامي اقدام) ستونزه حلولی شي".
دا د جمهور رئیس په توګه د ښاغلي ټرمپ لومړی ځل دی چې له ایران څخه یې پداسې حال کې په اتومي پروګرام د خبرو غوښتنه کړې تر دې وړاندې یې ویلي و په تهران به د خپلې لومړۍ دورې په شان د "اعظمي فشار" پالیسي روانه وساتي.
سپینې ماڼۍ پدې هکله څه ندي ویلي چې جمهور رئیس ټرمپ دا لیک خامنه یي ته څه وخت او څرنګه لیږلی ځکه چې په نیو یارک کې په ملګرو ملتونو کې د ایران سیاسیي استازولۍ لدې لیک بې خبرې ښودلې.
ایران لا خامنه یي ته د متحده ایالاتو د جمهور ئیس په لیک تبصره نده کړې خو د بهرنیو چارو وزیر، عباس عراقچي ویلي چې هیواد یې تر څو چې امریکا د اعظمي فشار پالیسي څخه کار اخلي، د اتومي پروګرام په هکله به خبرې ونکړي.
د ایران دې تر ټولو لوړ پوړي دیپلومات د سعودي عربستان د جدې په ښار کې د اسلامي همکارۍ سازمان غونډې په یو جلا مجلس کې خبرداری ورکړی چې د دې هیواد اتومي پروګرام د نظامي عملیاتو د لارې نشي له منځه وړل کړی.
هغه پدې هکله وویل، "دا یوه ټکنالوژي ده چې مونږ تر لاسه کړې. ټکنالوژي په مغزو کې ده او بمباري پرې نشي کیدی".
عراقچي د تیرې فبروري میاشتې په ۸ مې نیټې هم ویلي و چې په ایران باندې د اقتصادي بندیزونو لیرې کیدل مذاکراتو ته اړتیا لري او زیاتوي چې دا مذاکرات د "اعظمي فشار پالیسۍ"له مخې نشي کیدی ځکه د هغه په قول دا به خبرې اترې نه بلکې د "تسلیمیدو یوه بڼه" وي.
د ایران روحاني مشر، ایات الله علي خامنه اي هم د حکومت څخه غوښتي چې د متحده ایالاتو سره خبرې اترې ونکړي او ټینګار یې کړی چې دا ډول دریځ لرل به "بې باکي" وي او زیاته یې کړه چې د واشنګټن سره خبرې اترې د تهران ستونزه نه حل کوي.
سره لدې چې امریکایي چارواکي وایي که ایران وغواړي یوازې په څو اوونیو کې اتومي وسلې جوړولی شي خو ایران تر ټینګار کړی چې اتومي پروګرام یې یوازې د سوله ایزو مقاصدو لپاره دی.
په عین حال کې علي خامنه یي چې د ایران په هرې بهرنۍ پالیسۍ کې د ورستۍ پریکړې کولو واک لري، ویلي چې په متحده ایالاتو باندې باور نشي کیدی.
فورم \ دبحث خونه